蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年09月30日
馬上成為壹會員

鯊魚魚翅 - 左丁山

前些時政府公開聲明政府人員以後設飯局招待客人,規定不許吃魚翅、拖羅(吞拿)與髮菜,表面原因當然係環保,但看深一層,呢三樣食物成本昂貴,而平時好少有人食髮菜嘅,一般只在農曆新年時候配以蠔豉,以示「發財好市」箒,剔除髮菜於政府餐單之外,係門面工夫而已,不吃魚翅與拖羅,就可以慳番不少餐費,以政府之「每人頭」方法計,邊度負擔得起請客人吃魚翅呀,就好似叫左丁山請客,左丁山好威風咁將吉鮑排除,以環保之名出之,其實係為自己荷包打算!
假環保之名,政府可以慳錢,但會唔會假公平貿易之名,為政府買入價錢較昂貴之咖啡呢?此則有待觀察。現時市場上凡係冠以「公平貿易」或「有機」嘅食物,價錢零舍貴過人,只有富裕人士先至吃得起,有連鎖快餐店懶醒咁話要響應公平貿易,引入公平貿易飲料材料喎,怕係加價手法嘅包裝術箒,可能賺得更多。
左丁山向來食無禁忌,除咗對身體證明有敏感性之貝殼類及辛辣食物之外,合法食肆有得賣嘅,只要食得起,一概吃之無誤。最近有超級豪華食店新開張,名貴鮑魚餐售價三千餘元(一人前),朋友叫左丁山去試吓,連忙耍手唔制,咁貴點食呀?結果呢,陸續有朋友回報,新名店幾令人失望,名不副實,貴起嚟更且完全冇品質支持,都唔知主理人如何善後。幾位試過新飯店嘅老友都話:「幾難打得贏L先生間飯堂!」如果話雷聲大、雨點小嘅話,呢間新名店或者當之無愧。
吃魚翅不必去極豪名店,海產L請吃飯,就去佢南北行辦公室附近嘅文咸東街「桃花源」,吃翅吃得痛快。上海總會之火朣雞翅,仍然保持水準箒,近日有食神,左丁山與朋友吃過,一致讚賞。海產L飯後順手送一本《中國鯊魚產業報告》(中國水產流通與加工協會組編,中國農業出版社,2013年4月),內載大量資料,有全球鯊魚資源分布和生產情況,中國近海鯊魚資源分布與生產情況、鯊魚產品貿易和利用狀況、鯊魚飲食文化與鯊魚產品營養分析等等,十分詳盡。原來全球鯊魚有465種,常見捕撈嘅鯊魚有100種,1999-2010年全球捕鯊量在70萬噸至90萬噸間浮沉,相當穩定,主要捕撈國係印尼、西班牙、印度、阿根廷、墨西哥與美國。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載