› 選擇地區
三藩市
紐約
洛杉磯
其他美國地區
香港 台灣 北美
 
2013年10月15日

菲律賓軟皮蛇 - 左丁山

菲律賓曾經長期係西班牙殖民地,今天不少菲律賓富豪家族仍是西班牙後裔,例如Makati地主Ayala家族,西班牙裔富豪係菲律賓嘅豪門世家,二次大戰後興起嘅家族,絕大部份係中國移民,其中又以福建人最多,在菲律賓華人商界,識講福建話方便過講英文。
聽當地老華僑講過,菲律賓在二次大戰前後,受過美國人管治,加上西班牙遺風,曾經係一個民主富裕,人民熱情開朗,教育程度高嘅國家,最弊係馬可斯在1965年上台後,因馬可斯貪權貪財,培養自己人利益團體,養成自己友主義(cronyism),甚至破壞民主選舉制度,在1969年大肆買票,挪用財政部花錢為自己助選,結果成功連任,在1970年發動大學生及人民大搞反美國帝國主義,然後藉機宣佈國家陷入危機及政變威脅,實施軍法管制,以對抗伊斯蘭叛徒及共產黨(這裏有一條方程式的,先發動天真大學生反殖反美,得人民上街支持後就踢走大學生,宣稱受到叛亂及共黨威脅,為了國家安全,實施軍事戒嚴法,大學生若再上街就會被捕,被鎮壓),於是解散國會,關閉媒體,圍捕反對派及昔日盟友,成為獨裁者。
如此奸險小人統治菲國二十年(1965-86),直至阿基諾二世被暗殺,菲律賓發生人民革命為止,馬可斯任內二十年,經濟增長可觀,菲律賓係香港人熱門旅遊地點,外資銀行雲集馬卡蒂,但另一方面,政府濫權,貪污無度,由上至下嘅道德風氣大壞,蠱惑仔當道,正是貪開就貪,朝綱不振了,睇吓現任總統阿基諾三世嗰相,就知道佢唔係一個可以扭轉頹風嘅大人物,似足軟皮蛇,怎奈他何?一位東南亞富商係福建人,曾以為有語言鄉親優勢,二十幾年前就大舉進軍菲律賓投資於金融房地產旅遊,點知頭頭碰着黑,始終搵唔到銀,結果仲激氣無數,浪費寶貴時間,約十年前佢卒之舉手投降,將所有菲律賓生意賤賣咗俾親信夥計,夥計接手幾年,又係落荒而逃,夥計對左丁山講過:「過江龍在菲律賓做生意一定會俾地頭蟲及軟皮蛇陰死吸乾,淨係與政府機關打交道已經可以氣絕身亡!」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載