› 選擇地區
三藩市
紐約
洛杉磯
其他美國地區
香港 台灣 北美
 
2013年10月17日

節省能源 - 左丁山

呢日左丁山收到邀請電郵,到尖東富豪酒店美村日本料理試嚐日本德島美食,德島究竟地在何方,根本毫無印象,請教日本粉絲小G,佢立即話:「在四國呀,由大阪坐子彈火車去,好快就到。」哦,佢自己都未去過,日本咁多地方,要再放幾年大假先至輪到去德島一遊喎。
嗰日事忙,中午到霞飛會館午飯,晚上基金L在禮頓道海都(未去過)做東,下午要過尖沙咀?辛苦啲喎,何況金牌編劇家師妹T在午飯後仲約好訪問?
正在叫秘書回答No之際,收到Q大姐短訊,話佢嘅良人當日會在美村示範用德島食材炮製粵菜,請左丁山去試食。嘩,咁又唔同,連忙叫秘書改say yes,事關Q大姐嘅良人Adam係業餘星級名廚,在朋友圈子中,係最著名之住家男人,在家打理家務之餘,晚晚煑靚餸俾Q大姐食,久而久之,練成一身好廚藝,時常受城中名店邀請作廚藝表演,另成一家。左丁山自從吃過兩三次之後,就成為佢嘅粉絲,因此豈能拒絕邀請?
於是同金牌編劇T傾傾下就要佢「請辭」,自己一枝箭咁衝落地鐵,直奔尖東,去到富豪酒店,已經滿頭大汗,點知富豪酒店學足日本慳電款,室內氣溫大概在25度以上,入到美村料理,有日本領事、德島名廚、德島旅遊代表,本港飲食副刊版記者、客人等等,數埋夥計,恐怕有六七十人,人多溫度高,於是熱上加熱,件恤衫濕晒,隔籬位女士慢慢變成「濕衣女郎」,嚇到左丁山只敢直望,不敢橫看。美食家鄧達智只穿一件有型無領T恤箒,行一個圈已經見佢頂唔順,打個眼色就鬆咗人,左丁山見到Adam,對佢講「專誠捧你場,餐枱滿佈食物,邊啲係你嘅傑作?」Adam話:「哎喲,俾人食晒啦,我稍後再煑過!」Adam做了陳皮烤阿波尾雞翼,蟹粉陳醋阿波尾雞件,鳳汁浸鳴門鰻魚,正是中日crossover,聽到左丁山流口水,本想等多十幾分鐘等佢,但等等吓,汗水自額頭滴下,呼吸開始急促,忍唔住咯,只得忍痛走人。富豪酒店聽講有女少主當家,果然識得節省能源,領教了。吃不到德島正嘢,好彩禮頓道Crowne Plaza酒店內之「海都」,令人驚喜,菜式有昔日鍾錦主理嘅影子,有舊時新鴻基海都嘅八九成水準,勝過今日其他海都。呢間酒店係爪哇集團物業,基金L與其中一位高層係香港華仁同學,唔怪得識喺呢度請客。不過聽講左丁山告辭後,張單有意想不到咁貴嘅「下欄」加小費喎。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載