› 選擇地區
三藩市
紐約
洛杉磯
其他美國地區
香港 台灣 北美
 
2013年10月28日

奧巴馬梁振英 - 左丁山

紐約時報一位女專欄作家Maureen Dowd以文筆辛辣著名,平時批評共和黨不遺餘力,係一位標準美國東岸自由派,自不然應該係奧巴馬擁躉,不過近年佢對奧巴馬不滿之情,溢於言表,經常不客氣咁指奧巴馬太過珍惜羽毛,講就天下無敵,要做,就推晒在民主黨人身上,譬如最近嘅國債上限之戰,預算案之戰,奧巴馬身為總統,行為似是座上客,一早聲言絕不與共和黨妥協,絕不談判,實際上苦了民主黨參眾兩院領袖列特與佩萊茜,兩人統率民主黨議員,與共和黨日傾夜傾,最後在死線前達成協議,兩會通過,奧巴馬第一時間簽署,召開記者會,發表談話,榮耀盡歸於他。
Dowd引述不同克林頓時期之民主黨及共和黨要人嘅意見,歸納起嚟就係,華盛頓係一個講求妥協嘅政治城市,奧巴馬高高在上,唔捲起衫袖,親與反對派議員商討談判,實質上係避責任。Dowd指奧巴馬出外「落區」,專往「藍區」(擁護民主黨州份),避開紅區(共和黨州份),初到白宮時,見到白宮私人戲院有咁多座位,表示驚訝,認為有十個八個「足夠俾總統一家人」坐就夠,但克林頓總統以前可能想為戲院增加廂座,將座位拍賣籌款㖭。點解呀?當然係克林頓擅於做公關,請人到白宮睇戲,係上佳公關手法,只嫌座位唔夠箒,那會嫌多。奧巴馬就唔肯做,唔願做,唔想與「政治敵人」見面握手,佢位私人好友、白宮要人Valerie Jarrett講過:“He's been bored to death his whole life. He's just too talented to do what ordinary people do.”嘩,咁講法,奧巴馬原來係大天才,不屑做普通凡人做嘅事情。
一位老友睇完Dowd嘅專欄(十月二十一日),來電分享:「喂,我地特首係唔係奧巴馬呀?梁先生又係不肯與政敵握手談判,落區就由盟友民建聯安排,唔通佢又係too talented,坐在禮賓府內,日日嫌悶,要搵一啲刺激,例如單挑王維基?」左丁山聽咗不禁大笑,笑完又擔心,梁先生似乎真係得個講字箒噃,要做事就推晒俾林鄭,林鄭孭政改諮詢方案,實在太沉重,難道梁特首又是「絕不妥協,絕不談判」?諗吓都驚,天才與白癡,你癡定我癡,在梁特首眼中,我地市民都係凡夫俗子,那有資格與他談判。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載