› 選擇地區
三藩市
紐約
洛杉磯
其他美國地區
香港 台灣 北美
 
2013年11月13日

偏舊厭新 - 左丁山

如林奮強話齋,免費電視牌照相對於公屋,貧富懸殊,人口老化,醫生不足等等大問題,只是小事一宗,但一男子居然有本事化小事為大事,拋出甚麼一籃子因素,不發牌予香港電視王維基,實在令人嘆為觀止。南華早報Gary Cheung報導講政府政務官極力主張發出三個牌照,警告三揀二會引發激烈爭議,行會成員林煥光、胡紅玉、羅范椒芬都主張發三個牌,廖長城、李慧琼、查史美倫三人以利益衝突為理由避席,還有三位不知何故缺席,餘下人士大概都站在一男子一邊啩,於是王維基就痛失經營牌照。
我地無厚愛於王維基,佢亦係向錢看嘅生意人一名,但佢係新經濟代表人物,九十年代開始嶄露頭角,千禧年後崛起,算係二十年來香港工商財經界之最佳新人類(如五十、六十年代之李嘉誠、郭得勝、馮景禧、李兆基等等),應是香港自由市場經濟之人辦,特區政府竟指其財力無持續力,明顯地偏好已有長遠歷史嘅大財團,真係幾無天理。
呢日聽互聯網界資深校友主講,佢話美國勁在新人新公司輩出,上一次科網股崩潰之時,Google都未知響邊度,十年前fb創辦人根本冇人識,五年前Twitter還是一個陌生名字,講遠啲,三十年前蘋果與微軟還是小公司小角色,IBM睇佢地唔起,呢啲新公司今天已統治了世界年青人,影響之大,無與倫比。香港還有不少人迷戀舊經濟,發夢炒樓發達,但本港一個歷史不太長嘅網上搵工網站已經以超高價賣咗俾澳洲公司,創辦人即使十幾年來冇買過樓,依家可以買番幾間山頂大屋。特區政府如還以老皇曆辦事,保護垂死公司及壟斷性電視,扼殺創意新人物嘅話,香港經濟將會迅速老化、失去活力。現任特區政府之目光與視野,十分狹窄,佢嘅支持者,如只識得聽吹雞之民建聯工聯會議員,看來冇乜視野,除咗講扶貧與抗拒輸入勞工之外,冇嘢識講,選民如在2016年選舉不踴躍投票,vote the rascals out,吾欲無語。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載