› 選擇地區
三藩市
紐約
洛杉磯
其他美國地區
香港 台灣 北美
 
2013年11月19日

作反了! - 左丁山

怪事年年有,似乎今年特別多,幾十年未曾見過嘅「作反事件」,竟然最近發生兩宗,第一宗係政府架構作反,通訊局向立法會交文件,內容竟與頭頂上司,商務局局長蘇錦樑唱反調,公然不同意最高首長梁振英嘅意見。雖則話通訊局有一位主席何沛謙,並非官方人士,但業餘兼任公職之人,極少極少與官方路線打對台,況且一般嚟講,主席只係俾意見,講觀點,所有文件皆出自政務官手筆,政務官何來豹子膽與局長及特首反枱?唔通係何沛謙下命令?只能下一個結論,梁振英之發牌決定除不得人心之外,蘇錦樑亦無個人威信,佢地都鎮唔住一啲公職人員,以致高級公務員趁機落佢面。
第二宗就係政府顧問竟然公開駁嘴,反擊政府拿着份顧問報告「斷章取義」。在任何地方,不止香港,國際級顧問公司一旦中標,拿到政府顧問合約,必然為政府賣命,為政府最高當局找到一啲非政治理由來下合乎理性的、合乎民望的決定。免費電視牌照當然涉及政治考慮,畢竟電視傳媒影響力大,並非起條大橋咁直接簡單,只涉及工程技術問題也。梁振英對住咪高𥧌講咗四次「無政治考慮」,當我地係幼稚園學生而已。做得呢類顧問,收費用其實已包含了「孭鑊費」、「委屈費」,報告交了出去,政府點樣運用,顧問公司都不可能出聲。何物Spectrum Value Partners(威普諮詢顧問),竟敢違反天條,其亞洲區總監伍珮瑩(Jenny Ng)向「壹週刊」及商業電台批駁政府「斷章取義」,實在令商界中人震驚。身為市民及支持政府發牌無上限,左丁山自然向吳女士拍掌,但如果係該公司合夥人,唔召開會議批判佢至奇,在商言商,顧問點可以公開公然挑戰客戶呀?最多咪在幕後表示不滿之意,麥肯錫啲高層倘若為美國政府服務後,公開批評美國政府行為失當,唔立即執包袱就係上帝保佑箒。顧問作反亦顯示,國際級人馬睇唔起梁振英蘇錦樑,大有「話知你死」嘅態度。梁振英俾公務員與國際顧問烚到上面,啲梁粉情何以堪?

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載