› 選擇地區
三藩市
紐約
洛杉磯
其他美國地區
香港 台灣 北美
 
2013年11月20日

孝敬祖父母 - 左丁山

房屋協會賣樓有新猷,想出一個「長幼共融」發展理念,喺筲箕灣推出「樂融軒」,高層有214個單位以市價出售,低層有60個單位租俾60歲以上長者,而且附加一項條件,準買家如果為長者租住單位,不論彼此有無血緣關係,只要肯宣誓表達長期照顧長者租客及提供租金擔保,就可以優先買入單位。
咁嘅安排前所未有,安排亦比較複雜,但主要目的好明顯,就係鼓勵一家三代甚至四代住在同一大廈,例如仔女結婚生子就買樓住在高層,父母/祖父母就租樓住在低層。至於邊個着數啲,未必係子女照顧父母嘅箒,以今日嘅社會情況睇,其實大有可能係父母出首期幫助子女買高層,自己蝕底啲,就在低層租一個單位。左丁山一位朋友有三層樓,本來與兒女住在一層,另兩層放租,前年兒子娶妻,今年女兒嫁人,皆因樓價、租金太高,難找新居,朋友於是自己住番舊一層,另外兩個單位分別俾兒媳,女與女婿居住,犧牲了租金收入。以房協嘅「樂融軒」售樓條件比較,其實要宣誓長期照顧親人嘅,可能係低層長者租客──照顧高層年青買家也!
無論如何,當大家庭觀念日漸淡薄之時,房協此舉對社會總有益處,值得支持。退休新亞校友呂令意校長(前何文田官中校長)有感於香港社會之敬老意識不算強,時下只有母親節、父親節,好似祖父母唔駛理會咁樣,但因港人壽命長,三代同堂家庭日多,呂校長於是與同道中人發起咗一個「祖父母日」,得到好多教育機構、志願機構及文化團體支持,喺十一月十日在摩理臣山香港專業教育學院舉行第一屆「祖父母日」,請中大校長沈祖堯教授主禮,沈校長話希望各人繼續努力,一年接一年,將十一月十日定為「祖父母日」。呂校長話希望喚醒社會各階層,重視孝道,為人父母者能從家庭開始「身言雙教」,以身作則,言行一致,為孩子樹立好榜樣,自少養成孝順父母習慣。房協總裁黃傑龍係呂校長嘅新亞師弟,黃總以「長幼共融」概念賣樓,不妨請呂校長/師姐去宣揚吓敬老孝道!
今時今日講孝道,似乎復古,但有人願意講,願意鼓吹,一定係好事,80後,90後請注意呀,想父母以至祖父母為你買樓?聲氣好啲得唔得呀?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載