蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年11月21日
馬上成為壹會員

左派市長 - 左丁山

十一月十八日在中大演講嘅Joseph E. Stiglitz(約瑟夫‧斯蒂格利茨)教授,在2001年獲得諾貝爾經濟學獎,今年70歲,嗰日講「危機過後亞洲及世界的可持續發展」,因佢係「干預派」,自然看重有形之手與政府干預,梗有人認為佢說得有道理,但市場派就幾難俾佢說服。
講無形之手、不干預、市場自會調節之鼻祖當然係Adam Smith(亞當斯密),英國有個Adam Smith Institute,設於倫敦,繼續宣揚其理論。目前嚟講,自2008年發生金融海嘯之後,聯儲局全力救市,實施量寬,催谷股市樓市,有形之手主導市場,講市場調節嘅亞當斯密學派會俾人鬧㗎,是故干預派理論三十年來第一次佔了上風,連最近紐約市市長選舉,都一舉打破二十年共和黨嘅壟斷,一位民主黨左派大獲全勝,聲言上台後大改前市長彭博之施政政策及作風,與香港出咗一個左派首長,情況有少許相同。
呢位紐約新市長白思豪Bill de Blasio(跟母姓)並非接下爛攤子,前市長彭博留下紐約市上最好嘅資產俾佢,例如紐約犯罪率大跌,成為安全城市,每年遊客增加至五千二百萬人,為酒店及百老匯帶來空前繁榮,紐約成為僅次於三藩市嘅生物科技投資城市,紐約市教育水平大大提升,市政府財政穩健,凡此種種,有乜唔好?樓價高囉,貧富懸殊囉,窮人數目十年不減囉,於是白思豪就利用呢種現象,提出向高收入人士加「附加稅」,向公務員、工人加薪,加大扶貧力度等等,用英文講法,白思豪政治形象好sexy,得選民歡心,彭博等共和黨資本家就十分「沉悶」,只識計數,不理會民間疾若。彭博係億萬富豪,靠彭博通訊社向金融界提供數據發達,因此佢有一句名言:"In God we trust. For everyone else, bring the data",即係話,除咗上帝之外,任何人與佢講道理,講政策都有要有充份數據做支持,只要有數據為推理基礎,佢可以隨時轉變思維。左派人物如白思豪等人當然重理想、重情緒,不願睇數字,譬如紐約市一年付出嘅退休警員長俸仲多過在職警員嘅薪津,若管理不慎,紐約會變成底特律。白思豪能否在紐約成功,相信香港左派會好有興趣追住睇。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載