› 選擇地區
三藩市
紐約
洛杉磯
其他美國地區
香港 台灣 北美
 
2013年11月29日

滿紙荒唐言 - 左丁山

有料實幹編輯左先生趁中文大學慶祝建校五十周年,出版一本中大校友口述歷史小書,竟然找上門來,要左丁山講番幾句,講古仔就容易啦,但左先生要攞一張本人嘅陳年大學生照片,就難以應命,主要原因係當年在校園兩袖清風,着一件花園街貨「太空褸」(十蚊一件)就過冬,全家冇一部照相機,故此平時極少影相,有之,亦係同學拍攝,未必曬多一張俾自己。後來秘書話不如尋找一啲昔年商界相片,是但搵張舊相片應景。於是搵吓搵吓,突然「發現」一張1997年5月8日在灣仔大王東街「蒸燉炆棧」與末代港督彭定康合攝嘅照片,蒸燉炆棧老闆之一係「香港學」大師洪清田,當日佢召集眾人與肥彭話別,相片中人就有肥彭、洪清田、黎則奮、邵盧善、王耀宗、楊吉壐、毛孟靜、徐詠璇與左丁山,好似仲有其他人嘅,但冇在呢張相片之內。
見到張相,就想起肥彭在1992年上任後,拜訪胡仙小姐,一齊吃午飯,左丁山坐在旁邊,當時佢構思擴大功能組別選民,但還未與魯平開火,大家曾經講到九七後《基本法》寫明香港邁向普選,肥彭笑笑口話:「要等到北京諗到辦法,預先知道邊隻馬可以跑出,就會有特首普選嘞。」
眨吓眼過咗廿一年,肥彭「笑話成真」,政改欽差大臣,全國人大常務委員會副秘書長兼香港《基本法》委員會主任李飛上星期訪港,發表講話,定下遊戲規則,特首候選人之提名必然授權予提名委員會,候選人數不能太少(即多於一名),又不能過多(睇怕係限於三至四人),而候選人必須「愛國愛港」。如此講法,即係在馬匹入閘之前,已經選定三四匹中央可接受嘅馬,邊隻贏出嚟都冇緊要,最緊要者就係篩走啲非我族類馬,舉例而言,提名委員會可提名梁振英、曾鈺成、葉劉淑儀、鄭耀棠等四人,不配足夠票數予余若薇、陳偉業呢啲反對派,於是市民普選出邊一位,北京都可以接受嘅。大編輯留意到李飛講普選,曾引《紅樓夢》詩句兩句:「都云作者癡,誰解其中味」,意何所指,耐人尋味,但大編輯話佢自己就想起此詩頭兩句:「滿紙荒唐言,一把辛酸淚。」有淚者,香港人也。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載