› 選擇地區
三藩市
紐約
洛杉磯
其他美國地區
香港 台灣 北美
 
2014年01月04日

果實有價 - 左丁山

呢日中午飯後,行路行到國金二期嘅city'super,聖誕之後,內裏人流大為減少,收錢櫃台再無好似聖誕前夕咁有百幾人排隊俾錢嘞,於是放心在內行吓,買番幾包殼果或堅果(nuts)作零食,呢輪有四種殼果在國際市場炒得幾勁,就係almonds,walnuts,pecan, cashews(即杏仁、胡桃或核桃、美洲胡桃、腰果),呢四隻堅果據講係健康食品,對抗老化有益,近年在美國與歐洲引起強大需求,於是價格穩步上揚(當然亦視乎生產增長率),杏仁嘅國際牌價在十八個月內由每磅2.5美元升至近月嘅4美元,升足60%,但環球需求依然強勁。
除咗歐美人士好吃健康食品之外,堅果之需求從何而來?又係關強國人事啦,中國從境外輸入嘅核桃由2008/09年嘅30,200噸急升至2012/13年度嘅150,000噸,增幅五倍,可謂驚人。據金融時報報道,去年11月份嘅「新英倫醫學期刊」(New England Journal of Medicine)有一篇文章講述哈佛學院嘅研究,發現「地中海食譜」(常吃nuts)可以減少心胸科疾病,常吃nuts可減低死亡率。
左丁山兩年前睇到類似醫學研究報導,開始每日吃堅果,體驗到愈食愈貴嘅經驗,美洲胡桃尤其貴得驚人,食核桃較為便宜,食食吓,真係想買呢類食品生產商嘅股票,研究吓先。
付鈔之後,走到國金一期出口,竟然碰到過去幾年長駐廣州嘅財務B,問佢係唔係趁聖誕新年假期回港度假?財務B話:「非也,已經辭咗職,返嚟香港休息一個月,過年之後,就到上海返工,轉投內房公司跟強國人老闆做事。」咁就要問清楚嘞,企定定講多幾句先。據財務B講,佢在廣州主要為港商搞投資買賣地產項目,二十年前佢嘅老闆憑此發達,在廣州設立分公司,但過去四年來,財務B話,港商在內地投資愈來愈難做,講資本、講豪氣、講關係,港商都輸晒俾內地公司,佢哋過去四年來,只能做一啲小眉小眼嘅地產生意,財務B恐怕長此以往,自己唔走都會被炒,趁自己還有市場價值,咪追隨大形勢,轉投強國內房公司陣營囉。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載