› 選擇地區
三藩市
紐約
洛杉磯
其他美國地區
香港 台灣 北美
 
2014年01月18日

樓市大淡友 - 左丁山

地產大好友L睇好樓市,認為在2014年即使下跌,頂多跌5%,買樓冇有怕。校友地產W就完全不同意,佢嘅觀點似係今天北半球天氣,好冷,好友L就似係南半球氣候,熱到跳舞。地產W在校友午餐會上講2014年樓市,話明係進入一個跌市循環(cycle),由開始至完結,樓價最多會跌五成,例如上一個跌市循環就係(1997-2003),六至七年間跌幅有五成,然後步入一個上升循環(2004-2012),市區樓價升咗三至四倍。地產W話:「我勸各位校友快啲賣樓,即使自己只有一間自住樓,都要賣咗佢,再租過。」校友聽咗,為此譁然,左丁山立即追問:「你自己賣唔賣先?」佢又答得爽快喎:「放盤㗎嘞!」但佢睇得咁差,大行經濟師又睇得差,加上乜D物D阻頭阻勢,二手樓盤幾難甩手嘅噃,有冇人肯接貨?突然間有一位校友爆出一句:「搵林奮強買啦,佢成日睇好!」此言一出,眾人轟然大笑!
此日打電話搵前線經紀陳女士一問,佢以往經常在左丁山居住嘅屋苑出出入入,帶人睇樓嘅,最近好似未碰過佢,不過還有佢手提電話,可以搵到佢,陳女士一聽就話:「左先生,我唔知最新情況呀,我轉咗行做文員幾個月嘞,做地產代理根本搵唔到食,我地做慣二手樓盤,更淡過凍水加冰,點捱呀,二手盤成交咁少!我以前有一個賣盤,三個月都搵唔到人去睇樓,我見勢色唔對,索性走咗去九龍東一間保險公司做文員,希望慢慢考番個保險牌搵食。」冇人睇樓,唔代表樓價跌。因為陳女士話好多業主唔順梁振英三辣招,死都唔肯減價,但潛在買家又不甘心俾咁重印花稅,係要業主減價,雙方僵持不下,於是冇成交,而樓價不跌。陳女士住在沙田第一城,上星期六佢出街見到林鄭月娥在沙田第一城商場外派傳單,有人同佢傾偈,但冇人示威抗議喎,陳女士覺得如果梁振英夠膽咁樣一個人在第一城派傳單嘅話,香港社會就平和好多咯,市民買樓都會有心機啲。但佢回家睇電視新聞報道,聽到一位阿伯對林鄭講,希望多建公屋,等佢地可以快啲上樓,陳女士當堂成個彈起,望真吓,劉江華站在一旁,陳女士懷疑呢位阿伯係劉江華預備嘅「媒」,非第一城居民,城民好少會合乎收入資格去申請公屋嘅噃!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載