› 選擇地區
三藩市
紐約
洛杉磯
其他美國地區
香港 台灣 北美
 
2014年02月03日

遊客如潮湧 - 左丁山

行廣東道見到大量遊客,絕大部份係內地人,全部係購物客,在此街道做零售生意,見到呢啲情況就開心,雖則話租金高昂,但根據市場原則,願意以貴租租入舖頭者,必有應付貴租嘅辦法,不用旁人粗心,就正如領匯接管房委會商場後,租金升,生意增加,商場遊人倍增,足以證明房委會管理商場幾咁無能。有人話領匯商場嘅貨物價格高,令公屋居民難負擔,唔係噃,居民難負擔就唔會買嘢,或買少好多,咁樣領匯屋邨商場生意何來?公屋居民嘅購買力比月入七萬元嘅中產夫婦加兩孩家庭還要高(有報紙計算過,如此家庭扣除供樓按揭供款外,可支配收入所餘無幾),只是陳婉嫻議員及其泛民同路人唔肯承認而已。
廣東道咁多遊客,據政府報告估計,將來還要多,2013年內地客有五千四百萬人,到咗2023年,人數會突破一億人次,如果估計屬實,一條廣東道怎能應付?有「蘋果」評論版撰稿人提議限制內地人來港,當然係下策,除咗違反市場生意原則,趕客之外,還要違反更重要嘅大原則,就是中國人民之旅行自由人權。香港已是中國城市,絕不能阻止同一國境內嘅人民來港,否則的話,上海話人太多,不准浙江人入來,北京話太擠逼,不許河北人到北京遊覽,成何體統?中國人不斷爭取人權、維權,自由出境到國外旅行,境內城市旅行,係不可剝削之基本人權,香港怎能單方面剝奪之,而在另一方面就拚命高喊「保護人權」?一啲人話香港應該開發「高檔遊客客源」,真係搵嚟講,歐洲美國日本之「高檔客」因經濟不景,來港比例日減,旅發局唔通要站在巴黎街頭郁手郁腳搶客咩?旅遊業界唔識搵客,要揸筆寫稿人教導先至識去開發新客源?笑話也。香港不能停滯不前,必須做大個餅,開發旅遊景點,增加不同購物商場及零售街道,令遊客不要集中在廣東道。有人講旅遊不只是購物,鬼唔知,現代社會當然有人「入深林,窮迴豁,幽泉怪石,無遠不到;到則披草而坐,傾壺而醉,醉則更相枕以卧,卧而夢,意有所極,夢亦同趣。覺而起,起而歸……」但現實係絕大部份人士講旅行只係飲食購物而已!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載