› 選擇地區
三藩市
紐約
洛杉磯
其他美國地區
香港 台灣 北美
 
2014年02月09日

能吃活雞就是好 - 左丁山

新年冇活雞食,認真不爽,好彩過年之前,食家V每年一度入廚親自炮製賀年風雞,左丁山聞風索食,佢整多兩隻送過來,放在雪櫃個幾禮拜之後,喺年初一晚上拿出來解凍,塗上蜜糖,配以雲耳靚豉油,蒸熟之後,家人無不搶吃,好快就一掃而空,梗係啦,雞肉腍、滑、香俱全,怎不教人垂涎?食家V對吃雞好有堅持,過年前兩個星期,去九龍城相熟雞檔買活雞,先問:「本地雞還是來自廣東?」一知道答案係內地雞之後,就走咗去旺角雞檔搵到本地活雞,先至肯買。冰鮮雞呀?佢話情願唔食。
到了年初六,左丁山忍唔住,行路行到周身大汗之後,走入一間「大家樂」買早餐,見有甚麼馳名「譽香雞」供應,於是買了一隻白切雞返屋企吃午飯,點知一咬落去,幾乎似係咬軟木頭,對牙齒有傷害性,果然係一分錢一分貨,雪雞與活雞係大有分別。
高永文等食衞局高官處理不善,容許內地雞污染本地雞,累到全港過年冇活雞食,其無能之處,令人搖頭嘆息,本港雞農損失慘重,怒火中燒,好有道理,值得同情,如果雞農有法國農民的「激情」,早已將不能出售嘅活雞在禮賓府門口全部放生了。梁振英仲乘機出嚟抽水,話要市民反思是否一定要食鮮雞?反思個屁咩,香港市民大多數鍾意食活雞,如做民意調查,一定反對政府禁絕活雞,高永文等醫生教授同路人,成日出口術嚇人,話食活雞難以零風險,世界上邊有食物衞生零風險㗎?香港雞農好守規矩,過往幾年相安無事,錯只錯在食衞局食環署無能兼自大,對內地雞檢疫制度不加改進,不想辦法分隔兩雞(內地與本地),大錯鑄成就乘機叫港人反思是否一定要食活雞,直情離晒譜。香港政客好多時見人講人話,見鬼講鬼話,譬如新年期間出現桂林街夜市,有好多人(包括記者)熱烈讚好,認為有本地文化風情,殊不知,桂林街附近居民會唔會覺得街頭混亂嘈吵污糟呀?一旦有人向食環署環保署投訴,政府是否視若無睹,不敢掃蕩無牌檔販?呢個政府連活雞都想禁,點解對無牌小販阻街唔去禁?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載