› 選擇地區
三藩市
紐約
洛杉磯
其他美國地區
香港 台灣 北美
 
2014年02月20日

呃廣告 - 左丁山

蘋果、am730被人抽廣告,係已知事實,至於理由為何,一言難盡,不談也罷。但久唔久就有啲冇人睇,冇人理,毫無影響力嘅特刊可以得到大量廣告,而且廣告費未必便宜㖭,究竟有乜理由呀?理由只有一條,就係不少人擦鞋捧場,以示俾面。
俾面邊個?中央囉,中聯辦囉。最近一位44歲中年漢子被控欺詐,妨礙司法公正等十項罪名,罪成,漢子要坐監二十個月。案情簡單,被告前年九月向人訛稱獲中聯辦授權出版一本刊物,要求名人刊登廣告,騙取36萬元,其中名人李丞責被騙二萬四千元。一位東華三院總理李鋈麟嘅職員比較謹慎,主動向中聯辦查證,揭發此事。
老實講,左丁山二十年來收過不少呢類乜乜所謂新華社中聯辦中央部會嘅刊物刊登廣告要求,全部一於少理,將來函碎紙了事,但李丞責等人點解要俾面呢?中聯辦個名咁大囉,想俾面中聯辦囉,只要呢種心態存在,同類事件仍會層出不窮。被呃之人唔駛同情!
真正刊物想搵廣告,反而冇咁容易,原因之一係讀者減少,專業廣告公司考慮買廣告之成本效益時,不得不考慮新途徑。一月中有一個調查報告指出(中大之市民閱報習慣及對電子媒體看法),超過33%市民少買報紙,改睇免費報紙,每星期睇收費報紙嘅人有63%,睇免費報有62%,56%「網上閱報」,用手機閱報嘅有22.3%。
呢啲數字顯示,傳統報刊兩面受敵,一方係免費報,一方係手機及互聯網,兩面夾擊之下,收費報紙讀者數目必然陰乾,影響廣告商落廣告嘅意欲。左丁山問過一位中大學生:「每日睇唔睇蘋果?」佢話:「睇呀,手機睇動新聞囉,個個同學都係咁。最多人睇動新聞,但好少人捨得用七蚊買份蘋果報紙!」會唔會買其他報紙呢?學生答:「更加唔會啦,火車站攞到邊張免費報咪睇邊張囉,最容易攞到嘅就係頭條」,聽佢講,幾乎冇一個中大學生唔睇蘋果動新聞,但極少學生買一份蘋果報,其他報紙更冇人買。如此看來,沙膽虹調動人力搞蘋果網是對的,亦唔怪得蘋果手機版有咁多廣告。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載