蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年03月31日
馬上成為壹會員

高檔遊客 - 左丁山

三月二十七日上午到金鐘亞洲協會參觀,行完咗個幾鐘頭之後,還未夠十二點,於是到Domani食簡便午餐,已經係早上預先訂位嘅嘞,仍然要坐露天座位,俾太陽曬到正一正,好彩當時不太熱,當吸收維他命D,防止骨質疏鬆可也。食到將近一點,埋單走嘞,點止露天座位已經坐滿人,室內當然座無虛設,點解咁好生意嘅?而且食客有九成人係歐美人士,有乜原因呢?呢個時候,太陽剛好移到去香格里拉酒店後面,於是露天座位一啲都唔曬,而且清風徐來,好不舒服,可惜自己已要走人咯。
次日在陸羽,餐廳R與美國朋友來到,唉吔,呢位美國朋友一年一度燕歸來,即係話Rugby時間到,唔怪得Domani坐滿外國人。問佢住在邊度,佢話:「今年住Upper House!房間靚,維港風光盡入眼簾,服務一流,冇得彈!」住在Upper House房間價錢一定好super。林建岳話過旅發局要不斷努力,爭取歐美高檔遊客來港,嚟香港睇七人欖球賽嘅歐美球迷就係高檔遊客嘞,可惜香港一年只有一次七人欖球賽,其餘時間冇相似節目呢!美國朋友話住在Upper House的確係好,只係欠缺氣氛,不似往年住在港麗,成個lobby都係欖球迷,大家可以飲得好癲。
美國朋友話已搬咗去洛杉磯西城區居住,鄰近UCLA校園,屬高尚住宅區,但樓價不算最貴(不計比華利山),發展商為迎合中國豪客,在LA外圍不斷興建超級豪宅,大到二萬五千平方呎咁大嘅獨立屋,俾中國大陸移民買入,大陸人就係地產市場嘅主要購買力,明益不少華裔地產經紀搵錢。洛杉磯市民對此見怪不怪咯,1980年代,日本豪客瘋狂買入洛杉磯名廈豪宅,結果一敗塗地,在日本經濟爆破後,紛紛賤價出售,益咗美國地主以低價回購,今次會唔會歷史重演呢?中國人當然話唔會,永遠有一個解釋:This time is different(今次不一樣),美國人就趁機搵番一大筆先至講,如上一次。佛利民話美國土地係搬唔走嘅,外國人要買幾多,就賣幾多俾佢地,毋須驚嘆也。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載