› 選擇地區
三藩市
紐約
洛杉磯
其他美國地區
香港 台灣 北美
 
2014年05月12日

乒總恒生有功 - 左丁山

2014年世界乒乓球錦標賽已經結束,香港女子隊得到季軍,成績與2012、2008年世界盃相同,比2006年得亞軍就有啲遜色,但不可不知嘅係,過去香港女子乒乓球隊靠外援支撐,外援即係來自內地,移民香港嘅乒乓好手,例如帖雅娜、桑亞嬋、林菱等,呢幾位新移民為香港女子乒乓隊打拼十年,年紀已達運動員退休之齡,今次香港女子隊靠乜人爭取到咁好成績呀?
睇真啲,左丁山為之拍掌叫好,原來係靠本地土生土長嘅女生爭取到嘅,主力球員係李皓晴、吳穎嵐、杜凱琹,三人加埋老將帖雅娜、姜華珺去砌,在八強半準決賽以三比零掃走德國女子,在準決賽就輸咗俾強敵日本,無話可說,教練李靜大聲講:「香港細路係得嘅!」
香港女子乒乓唔靠外援而有出色表現,全靠青訓有功,乒總主席余國樑話恒生銀行贊助嘅青訓工作初有成效,以後會繼續落去,唔會再走倚賴內地移民好手嘅舊路,盡力培養本土球員上位。
余國樑係乒總老會長余潤興嘅公子,余家養好多馬,過往擺喺黃汝安馬房,皆以「神駒」為名,例如今季曾跑過入位置嘅「雪風神駒」,現在多數放在告達理馬房,余家養馬多,馬圈無人不知,但更為乒乓球迷知道嘅,就係余家兩代人幾十年來支持本地乒乓球,貢獻大過香港政府好多。現時政府撥款俾乒乓球運動,只係贊助金牌冠軍級球員,所謂精英運動員,但青少年學習乒乓球呢啲基本紮實功夫,政府就唔理得咁多,要乒總負責晒,好彩有恒生銀行願意多年來贊助乒乓青訓,讓本港青少年有機會學習、練習乒乓球,有機會成為本地辣薑,唔使成日依靠在內地入不了國家隊嘅乒乓球員移民來港。
呢日飲茶時與乒乓發燒友公子L講起乒乓世界盃,佢大讚香港女子隊表現出色,第一個就係要多謝恒生銀行,第二個就係多謝乒總高層盡情捐獻,點解要捐獻?公子L話:「你有所不知,培養一個世界級球員,必須送佢地出去比賽爭取經驗,向先進學習。每年每位球員出外,三四十萬銀唔少得,幾年來用咗近四百萬港銀,邊個俾呀,唔係特區政府呀,而係乒總的會長主席理事!」捐錢俾乒乓,真係無名無利,盡顯無私胸襟呀!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載