› 選擇地區
三藩市
紐約
洛杉磯
其他美國地區
香港 台灣 北美
 
2014年05月16日

難阻「入侵」 - 左丁山

三藩市今天好繁榮,樓價租金居高不下,舊租客有租金管制保障,笑騎騎,年青人想搵新租盤,就貴到冇法負擔。本港不少評論員、議員對租金管制好嚮往,不妨到三藩市考察,價格管制(包括租管)永遠係保障既得利益人嘅,經濟學家早有明訓,只係太多人唔願意聽,係要以心思維,不用腦袋分析,講情緒蓋過講理性而已。剛逝世嘅諾貝爾獎經濟學家Gary Becker四十幾年前提出兒女係「耐用消費財」(consumer durable)時,俾人鬧咗無數次,但今天所有富裕國家嘅生育率都係好低,充份證明Becker嘅理性分析正確啦。
朋友K話三藩市人好前衞環保,越來越多年青人踩單車返工及往來玩樂場所,為減少排放,為環保盡一分力喎。市政府於是在本已擠塞嘅非寬敞馬路劃出單車線,俾單車專用,於是汽車巴士交通更加擠塞不堪、寸步難行,令坐巴士到市區返工之人,叫苦連天。點解會有Google、Apple巴士出現呢?就係因為不少僱員喜歡住在三藩市,呢班人有錢,薪水高、花紅多,負擔得起新樓盤、新租金(幾似強國人在港買樓租樓),又唔鍾意揸車到矽谷返工,於是人人騎單車到特定地點上旅遊巴士,單車當係行李,放在車肚,一上巴士就拿出電腦、iPad上網,本來安排得幾好,但巴士站附近居民就睇到眼火爆,咪追打巴士抗議囉。
不可不知嘅係,三藩市與矽谷同屬美國土地,三藩市絕無可能限制矽谷IT人「移民、入侵三藩市」,故此三藩市政府唔駛禁止「一簽多行」(因根本無簽)。同樣事情在2047年後可能會在香港發生嘅,到時嘅世界唔知點,假使到時中國大陸人已可以如美國人一樣,有完全進出境外權利,不用「簽」,回復到1930年代大陸人可自由進出香港咁樣,香港人有乜可能拒絕之?甚麼港人港地政策,係庸人自擾而已。
與朋友K講得三藩市多,不如講吓投資,佢話全美只有一個話題,就係馬雲與阿里巴巴,因Jack Ma與Alibaba嘅名稱好易讀,美國投資界易上口,講得特別興奮,另一批暗地裏感到興奮嘅人士就係trial lawyers,佢地希望阿里巴巴上市後,有投資者質疑盤數,控訴淘寶網賣假貨,俾佢地一個機會展開「集體訴訟」,敲番阿里巴巴一筆。美國律師特多,靠此搵食者,不計其數,阿里在美國上市,令好多律師笑騎騎!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載