› 選擇地區
三藩市
紐約
洛杉磯
其他美國地區
香港 台灣 北美
 
2014年07月05日

荷蘭勝巴西和 - 左丁山

今屆世界盃幾好睇,特別係十六強淘汰賽,八場波之中,有五場打到加時,其中巴西與智利及哥斯達黎加與希臘更要射十二碼先至分出勝負,戰情之緊湊,歷來罕見,本來以為強弱分明嘅比賽,例如法國對尼日利亞,激戰至最後十分鐘,尼日利亞球員紛紛體力不支,連續抽筋之下,法國隊先至可以入到波。
星期六(七月五日)凌晨,八強會戰開始,今早已經知道結果,寫稿之時,仲係靠估,頭場法國對德國相信會打甩髀,左丁山稍為睇好法國,因為今屆德國隊強在中場人才濟濟,但前鋒缺人,威力不大,對住阿爾及利亞已經露出攻力不足嘅缺點,反之法國前鋒比較可靠,中場亦攔截有力,在關鍵時刻有把握多啲,可以僅勝德國。
至於巴西,前鋒費特(Fred),祖(Jo)兩人皆廢,愧為巴西國腳,另一位侯克(Hulk)得個大件,腳法又係麻麻,於是靠晒尼馬,但尼馬身材單薄,對智利時已經俾兩人夾攻嘜死,中場方面,進攻組織靠奧斯卡傳送,完全無把炮,人手似係歷屆最弱,全憑主場之利先至可以捱到入八強,對哥倫比亞一啲都佔唔到上風,如果輸波,唔駛驚奇。
預測明早賽事,更有興致。阿根廷對比利時一場,左丁山扒冷買比利時。阿根廷雖有美斯單天保至尊,隨時可以射出神級入球定勝負,但整體嚟講,阿根廷中後場認真麻麻,未必頂得住比利時嘅強攻,年青一代比利時球員被稱為「黃金一代」,個個都係廿歲出頭,係冠軍黑馬嚟㗎,只望佢地能夠完全箝制到一個神人──美斯而已。
至於荷蘭對哥斯達黎加,荷蘭勝算係高啲嘅,哥斯達黎加打到入八強,已算喜出望外,全國狂歡,一啲哥國記者只攞到出差費夠三場初賽之用,點知贏完又贏,令到哥國記者在巴西要撲水,明早對荷蘭,氣數差唔多嘞,球員與戰術再無新奇之處,荷蘭教練雲高爾咁醒目,必定有一套對付哥斯達黎加嘅戰術,此仗賽前論戰,荷蘭佔六成贏面。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載