› 選擇地區
三藩市
紐約
洛杉磯
其他美國地區
香港 台灣 北美
 
2014年07月17日

下半年投資 - 左丁山

校友會午餐例會,上星期三舉行,因本港經濟陰晴不定,政治局勢不明朗,今次特別邀請幾位校友講述下半年的經濟及投資環境情況。
第一位應邀發言嘅係首席經濟師N,佢講以前本港經濟講進出口與工業製品,但現時本港GDP有92%來自服務業,與進出口已無甚關連,服務業之中,本地人需求增長最快嘅就係醫療護理、教育、社會服務(左按:可惜梁振英政府已放棄曾蔭權時期話要發展嘅兩大產業,即醫療與教育),與房屋,呢四個板塊都出現不同程度嘅求過於供迹象,但「擴充容量」速度緩慢,形成樽頸,變相「趕客」,係十分可惜嘅一回事,反之,一向受重視之金融業已有供過於求情況,銀行業尤其冇乜增長前景,新畢業生不宜再抱做賓架嘅夢想。
然後有歐資銀行財富管理部執行董事P發表意見,董事P表示唔睇好A股與港股,下半年投資重點仍然係歐洲與美國,標普500與杜指雖已處於高位,仍有上升動力。佢間銀行最近與世界上數一數二嘅巨型基金嘅策略師開腦震盪會,意見相當一致,就係聯儲局即使加息,到2015年年尾,息率仍然唔會超過2厘,故此利率仍然對股票有利,繼續睇好美股,其次係歐股(左按:彭博有分析文章預測2015年尾美元利率會係1.5厘,2016年尾會接近2.5厘)。
加息就會影響樓市,請王文彥講幾句,佢話午餐談話最好短如女士迷你裙,愈短愈吸引,點知佢講開就有癮,開口不能自休,搞到條裙愈來愈長,唯有叫佢點到即止,要點就係細價樓創新高係散戶入市搶貨箒,啲聰明錢(smart money)就係大戶與大發展商,新嘅一手樓盤與二手豪宅不斷減價,顯然聰明錢與散戶有不同看法,佢叫諸位校友有樓就賣,自己住嗰間都賣埋,租樓住算數!如此悲觀,睇嚟梁振英可以請王校友加入中央政策組唱低樓市。差唔多兩點嘞,請優秀財經演員涂國彬講吓冧把,涂校友係後起之秀,指出港股上半年缺波幅冇升幅,下半年可能物極必反,要買嘅話,就買安全號碼,即0001,0013,700,0027,2800,6823與388,買後可以睡得安樂喎!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載