› 選擇地區
三藩市
紐約
洛杉磯
其他美國地區
香港 台灣 北美
 
2014年07月18日

老左變走資 - 左丁山

博士G請客,搵埋天真許、地產C、博士L、散戶股神T等人,在中國會吃「老婆唔俾食」嘅「不健康食品」,例如豬皮、豬油、炸兩腸粉、乾炒牛河、馬拉糕等等高膽固醇傳統點心糕點,吃得不亦樂乎,食食吓就講起佔中一事。中國會在中國銀行舊廈頂樓,相傳係1967年暴動時期之反英抗暴鬥委會之神經中樞,現在就係華洋雜處,有時洋人顧客多過唐人嘅中國會,裝修就有六十年代毛澤東主義之影子,精神面貌就係21世紀資本主義,在此地方議論2014年之佔中,有特殊氣氛。
大家都認為佔中即使實行,對本港經濟、社會影響不大,好難好難危害香港經濟嘅。股神T原來在67年暴動時做過一間新蒲崗工廠嘅工人鬥委會委員,上街派傳單駡黃皮狗、白皮豬,後因林彬被燒死事件,股神T自覺情況凶險,立即辭職不幹,並且加入明報跟隨查良鏞反共去了,佢話:「細佬仲左過我,成日話要上北京做紅衛兵,後來家姐度咗條好橋,籌錢送咗佢去東京學習,結果佢變成反共青年。年輕人性格浪漫、激情,十年之內不知會變成甚麼人物,不必對佢地嘅口號過於緊張嘅。」
地產C成日被人批評為地產霸權塗脂抹粉,其實佢讀書時仲激過黃之鋒好多倍,與岑建勳、莫昭如、鍾倫納、陳以珩等人在維園搞反貪污、捉葛柏示威,俾警察追住用藤牌打,佢用手一格,藤牌入肉,一扯之下,一小塊肉扯甩出嚟,至今右手仍留有疤痕。當日痛到入心入肺,今日講起往事就談笑風生,指年青學生為社會發聲,無可厚非,事過境遷之後,咪又係要為人生奮鬥!講永久革命(Permanent Revolution馬克思、恩格斯之理念之一),世上無幾人做得到,大多數係口噏噏,年青學子為此造夢嘅箒。
左丁山從來不是浪漫之人,大概是從少就讀右派學校,十月十日要跟唱「三民主義,吾黨所宗」有關,入到大學亦係右派,主修經濟學,課程全是庸俗資本主義理論,與馬克思經濟觀對着幹,成為自由市場派、自由思想派、個體主義派。這數十年,潮來潮去,香港年輕學生從親共、極端親共,演變成恐共、抗共以至今天的反共,北京不知是否有雅量反省吓。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載