› 選擇地區
三藩市
紐約
洛杉磯
其他美國地區
香港 台灣 北美
 
2014年08月07日

第一間必勝客 - 左丁山

七月三十一日本欄談及「買Pizza公司」,即日收到一位讀者電郵云:
「小弟今日在蘋果日報拜讀先生發表『買Pizza公司』一文中提及香港的Pizza Hut是由怡和集團引入香港的?這似乎有點出錯了!
根據小弟的認識,香港Pizza Hut早期是由一間在香港代理Akai音響的公司名P.H. Shek父女檔引入來香港的,他們第一間開的總店就是在尖沙嘴中心地舖及地庫一層打通經營的,當年Shek先生和女兒兩人都在店中打點一切,Shek先生女兒還穿上了侍應的圍裙在店中穿梭招呼客人呢!此情景今天難再的了!左先生不妨向朋友翻查一下詳細資料。」
多謝呢位讀者提醒,於是左丁山翻查資料,知道香港第一間必勝客於1981年開業,怡和集團到咗1987年先至擁有必勝客香港經營權,即係話1981-1987年之六年間,另有人經營香港必勝客,但左丁山搵唔到是那一個集團,那麼讀者所言,應近乎事實,如有其他讀者記得清楚,請來電郵通知。
左丁山第一次食「必薩餅」(以前北京叫法),係在置地廣場,未曾在尖東尖沙嘴中心食過,尖東在80年代,十分興旺,後因交通往來不便,人氣漸失,今天已經輸晒俾尖西廣東道,一說與地運有關,科學之分析,就係尖東規劃有失策之處,無謂再提。
此日在中午飯局上碰到成班財經名嘴,聽電訊P講未來大勢,佢話不知iPhone 6何時推出,但預料大概在秋季,香港手機市場銷售量增長,下半年靠晒iPhone 6,如果唔掂嘅話,今年嘅增長就係咁先,電訊P話好在佢地嘅固網及寬頻基建生意仍然有穩定增幅,唔係靠晒智能手機銷路啫。電訊P嘅策略係完全避開「內容創造」(creating contents),一味注重「基建」(infrastructure),即係起定一啲大馬路俾法拉利、寶馬、本田……通行,架架車經過都要交過路費,咁就夠晒穩陣,似收租一樣,內容創意呢啲事如設計法拉利,咪由王維基等創意人去開拓囉。名嘴L話呢個生意組合模式雖無驚喜,勝在穩定,唔會令股東突然震驚,持股可以瞓得安樂。名嘴L唔見咗一排,眾人問佢去咗邊,佢話三個星期前黃昏時間六點幾,佢參加小型馬拉松賽事,跑十公里,想在一小時內完成,跑到最後一公里,盡量谷起,點知一過終點就昏倒在地上,醒來後已身處仁濟醫院急救病房,病情係中暑、缺水導致急性腎衰竭,救番後在醫院吊鹽水五日先至出院回家休養。大家慶幸名嘴L夠運兼命大,也因此知道中暑原來可以係咁大件事,普通做運動健身即可,不可抱強烈求勝之心呀!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載