› 選擇地區
三藩市
紐約
洛杉磯
其他美國地區
香港 台灣 北美
 
2014年08月21日

到英國讀書 - 左丁山

8月份係海外大學招生季節,呢日見到一份廣告,因有陶傑相片,特別睇多兩眼,原來係英國大學招生廣告,內裏有不少名氣學校,唔駛賣廣告招生呀嗎?佢地肯收嘅話,香港文憑試考生會排隊由中環排到筲箕灣,何況仲要搵陶傑做icon?初為人母嘅記者G話:「哎吔,個個父母都想子女到英國讀大學,可以讀到有陶傑咁叻呀!」你就想咯,陶傑係才子,才氣係天生嘅,冇得讀嘅,如果到英國讀書嘅學生個個可以成為陶傑,申請入學嘅年輕人會由香港排隊排到上廣州咁長。
地產M就有仔在英國讀大學,剛回港放假,M公子陪埋地產M到中環飲茶,衣着光鮮醒目到極,標準英國紳士款喎,與從加州回來放假嘅學生P打扮完全唔同,學生P穿NBA籃球員短褲,長可及膝,配一件Chris Paul嘅球衣,半個黑人青年裝扮,與M公子相比,好似係南極與北極。問M公子:「你日日都着成咁?」M公子話:「唔係一定嘅,不過好多同學都着得好型,我唔想咁寒酸!」哦,好彩地產M已經搵到上咗岸,由做地產經紀做到有十幾層樓收租,咁又支持得到地產M公子在英國讀書着靚衫揸靚車嘅,地產M向左丁山解釋:「阿仔間大學有好多富貴同學,唔係白人呀,全部來自中國大陸,佢地個個着靚衫,揸靚車,呢,啱啱有一位趁暑假招待幾個同學去上海觀光一星期,話要盡地主之誼,包埋阿仔來回機票(倫敦至上海),及五星酒店住宿,搞到阿仔與同學鬆毛鬆翼,我已經警告佢,我冇錢還禮㗎!」
左丁山為之聽到哈哈大笑,跟住善意警告M公子:「你因住畢業回港後,識講流利普通話,英文反而唔多掂!」內地學生留英者,聽講多數有錢,「窮窮地」嘅就嚟香港或美國,唔怪得教育係英國一門大產業,美國大學亦盡力吸引中國學生,睇霍士電視嘅新聞短片,講加州Santa Clara大學(查史美倫母校)如何努力為中國學生服務,便知一二。唔怪得CNN有段新聞話,香港學生考SAT,報名慢啲嘅話就會冇位,因為每次SAT考試,都有極大量中國學生來港參加(因中國無SAT試場),有啲趕時間嘅香港考生,因香港冇位,唯有飛過去星加坡考SAT!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載