› 選擇地區
三藩市
紐約
洛杉磯
其他美國地區
香港 台灣 北美
 
2014年09月09日

中國紅酒 - 左丁山

今年的中秋月餅似乎銷路極好,各大牌子月餅紛紛加價,令愛吃月餅嘅左丁山第一次覺得月餅真係幾貴吓,半島嘉麟樓奶黃月餅傳言炒到五百蚊一盒,嚇親人,前幾日中環中心嗰間「大班」麵包西餅店,一連五日早上唔賣麵包(如雞尾包等),理由係店內廚房嘅人手要集中做冰皮月餅喎,此乃該店開店以來第一次早上停賣麵包,可見冰皮月餅生意之好。
但應節紅酒就銷路麻麻啫。退休銀行家、專欄作家張總每年秋季,例必來港教書一個學期,今年除咗仍然在城大EMBA教半科(與法國籍銀行信貸評級專家合教)銀行學外,還應中文大學酒店學院之邀,向酒店系學生開授一科「紅酒學」。左丁山聞訊,即刻捉住佢到九月份之校友午餐會演講,張總揀嘅題目係「紅酒新世界」。佢話每年一度,八月份例必在巴黎小住,兼到意大利試紅酒,發覺一隻Barbaresco (D.O.C.G.)幾唔錯,售價近一千二百港元,值得推薦。回港後為新課程準備材料,花咗幾日在中環行酒窖,發覺紅酒價格可以打折又打折,係近年來最便宜嘅價格,原因似與內地打貪有關。張總退休後,在上海長居,對內地情況所知甚詳,已知內地大款、富豪不敢大手買入高級紅酒送禮,自奉亦好克制,故此高價紅酒市場在內地進入冰封時期,在香港嘅靚酒,難以轉口進入內地,有乜辦法唔割價求售吖。
不過長期嚟講,中國會成為世界第一紅酒大國,現時在山東、東北、寧夏一帶,已有近二百萬畝土地轉化為葡萄園。氣候、土壤皆適宜,可以種出媲美波爾多葡萄嘅,係銀川附近嘅賀蘭山海拔一千公尺嘅東麓地段,已有小型酒莊進駐,每年產量只有五萬樽,是為中國紅酒珍品,張總特別推薦「2009年賀蘭晴雪加貝蘭特別珍藏」,市面上很難買得到,張總在上海搜尋到一樽,與法國友人品嚐,讚賞不已;英國著名酒評家Jancis Robinson(牛津畢業生,主修哲學及數學)對「2009年賀蘭晴雪加貝蘭特別珍藏」更加誇讚。但以事論事,中國的葡萄樹樹齡尚淺,若要生產大量真正一級紅酒與歐洲紅酒國家競爭,還要多等二三十年,現在中國每年紅酒消耗總量是十八億五千多萬樽,已超越法國的18億樽,世界第一,但中國人口遠超法國,人均耗量只是1.4公升,低於法國人的每年52公升(香港是4.5公升),即係話中國紅酒市場大有增長空間,故此歐洲酒莊紛紛到中國搶灘!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載