› 選擇地區
三藩市
紐約
洛杉磯
其他美國地區
香港 台灣 北美
 
2014年10月03日

葉劉威脅大 - 左丁山

梁振英從來不隱瞞他尋求連任的想法,以目前的形勢看,雖然他的民望低微,但連任的機會視乎有無對手,不論是欽定入閘式的普選還是選委會的小圈子選舉,只要CY嘅對手係鍾樹根之流,佢獲選連任嘅呼聲高唱入雲。
阿爺目前最大考慮係維穩,不斷強調「國家安全」、「防止外國勢力干預香港」,兼且要候選人「愛國愛港」,一定要夠「紅」、「染紅」至得。紅得嚟又要識管公務員,講英文上得英文台,有番咁上下資歷先至得,假假地香港係世界金融中心,特區之首唔可以譚耀宗、鄭耀棠嗰類呀嘛!
CY班內閣成員,有邊個夠膽挑戰CY,在2017年走出嚟競選呀?睇落就冇嘞,曾德成根正苗紅,但管治公務員恐怕唔掂,畢竟曾俾港英拉過坐「學運監」噃。曾俊華以前有過聲氣,但呢位番書仔自MIT畢業,美國關係成籮,又冇簽名反佔中,未夠紅啫,做番技術官僚就得,選特首難比CY更獲阿爺信任。林鄭在呢次對付「佔中行動」中,唔夠狠,口快快講咗「警察使用暴力」,竟然要發稿澄清話應該係「使用武力」,有婦人之仁,阿爺要扣佢分,家人長期居住英國,況且佢已講過多次自己唔會參選,我地「信住先」。
羅范椒芬在電台講警察「使用武力」,竟然流出眼淚,要用手巾仔抹眼,太軟弱了,又係阿爺眼中嘅the weakest link,炒得。呢呢,葉劉淑儀在適當時候表現勇悍,極力撐警察使用催淚彈,鬧學生態度好囂張,指示威群眾有物資、有組織,想將香港推向一個無政府狀態……總而言之,葉劉淑儀講嘢,極啱阿爺胃口,如果佢做特首,保證會維護國家安全,鎮壓反對派唔會騰雞。另一方面,葉劉做過高級公務員,紀律部隊佢管過,港大英文系畢業,史丹福碩士,英文叻過民建聯工聯會啲嫡系多多聲啦,出到國際舞台,接受CNN訪問,唔會失禮。佢聰明到喺呢個時候站出來撐警察,表面上係支持梁振英,暗地裏就係埋下伏筆,想阿爺知道,香港有一個viable alternative,即使CY突然心痛或腳痛即刻有人可以頂上,蘋果日報越罵她,她越高興。CY想一路做到2022?葉劉淑儀係最大潛在威脅。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載