› 選擇地區
三藩市
紐約
洛杉磯
其他美國地區
香港 台灣 北美
 
2014年10月05日

催淚彈催發示威 - 左丁山

九月二十八日,醫生N與家人吃晚飯之際,接到不少短訊,講金鐘政府總部外發生警民衝突,警察放催淚彈,恐有不少傷者,請醫生N到金鐘做醫療義工,醫生N於是急急去金鐘與一班中大醫學院舊同學及其他醫生集合,做醫療後勤義工隊。是晚據警方後來公佈,發射咗87發催淚彈,幸好無人當場受傷,有無後遺症則無數字。醫生N話當晚好彩冇乜嘢可做,佢自己亦變成靜坐示威一員,在現場吸入不少催淚煙。
第二日中午,醫生N就覺得喉嚨乾涸、身體疲倦、成身軟軟地,佢心知不妙,速忙入房睡覺,幾乎瞓咗成日。佢自九月二十七日起本來攞假在屋企讀書,準備考專業試嘅,點知放假第二日就中招,以後連續五日不能集中精神讀書,讀一兩小時就會眼瞓,呢次考試唯有打天才波咯。
警方高層開記者招待會講點解放催淚彈,語言荒謬,說話水平幾低吓,例如:「正常人唔會帶同保鮮紙包面,明顯係有備而來……」呢類廢話,本末倒置到極,示威者就係驚胡椒噴霧先至用保鮮紙護眼箒,點會係攻擊性呀?警察戴防毒面具就係帶有高度攻擊性?笑話也。
警察講放催淚彈之必要,合乎國際標準,亦係噏得出就噏,左丁山懶懶地引用沈旭輝博士在信報專欄(十月三日)講法國警察在甚麼場合使用催淚彈:2008學生考試後上街慶祝的騷亂、搶掠破壞擲瓶罐攻擊警察,2008年法國師生抗議削職位,集體上街向警察擲石,2012年法國環保人士抗議興建新機場,集體擲石、烟花與燃燒瓶。
香港學生在九月二十八日只係用保鮮紙、擔遮,同法國學生之騷亂,相去甚遠,香港警察竟然放催淚彈,自然引起近乎公憤,大量青年睇到電視畫面與短訊,群起到金鐘支援,引發起佔領旺角、銅鑼灣,後再延伸至尖沙嘴、灣仔,變成一個難以解決嘅局面,追起源頭,警察總指揮難辭其咎。梁振英政府相信已知催淚彈鑄成大錯,立即改變方針,改用「死守」一招,與示威人士鬥長氣,西方傳媒紛紛引述政府人士講,政府預備容忍鎖街封路一段時間,除非示威人士衝擊政府總部或警察總部,如發生如此情況,就立即強力反擊,如否,就用忍忍忍招數,拖字訣,以靜制動!
(按:左丁山昨日講余英時先生演講全憑記憶,如有錯誤,全與余先生無關。)

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載