蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年11月18日
馬上成為壹會員

閹豬競選 - 左丁山

左報猛烈攻擊佔領運動,好容易理解。由於佔領道路,影響交通及佔領區內嘅零售食肆生意,受影響商人怨氣日深之餘,亦感到經營受到威脅,自自然然地,香港民意逐漸傾向要求佔領者撤場,佔領人士難以長期漠視之!
但左報罵人,好多時無甚邏輯,例如上星期四就猛烈指責香港大學年花45億元,竟然成為培養佔中學生溫床,縱容學生違規犯法。左丁山睇完,幾為徐立之慶幸,如果佢仍然係港大校長,恐怕會飽受壓力,俾中方機構打溫情牌、壓力牌,幾難唔疲於奔命,哈,咁啱得咁蹺,香港大學在備受爭議情況下,請咗一位英國人做校長(即港大反佔中派大將盧寵茂教授公開反對過嘅馬斐森教授),中方對佢冇乜着力點,施壓冇咁容易;唔,建制派又有陰謀論可講嘞,馬斐森代表英方勢力,派來干預香港事務嘅,所以故意姑息港大師生佔中。
奧巴馬在北京當住習近平面公開講,美國冇涉入香港佔中運動,但本港建制派仍然大肆周圍宣傳美國黑手、美國勢力,難怪有一位哲學教授在飯局評論話:「建制派太過習慣一言堂,上頭交帶咁樣講,就全部冇晒獨立思想,跟足party line,我都為佢地難過。」
日前本欄講美國真普選,指美國係聯邦制,小州加入聯邦之時,為免除小州利益不受大州(即人口多嘅州份)踐踏,所以選總統還要由選舉院(Electoral College)投票。金融時報一位專欄作家Gary Silverman係居於紐約嘅美國人,佢在中期選舉後(十一月八日)就講出:「我完全唔明白Iowa(愛我華)州。」愛州共和黨有一位女士Joni Ernst與民主黨人競選參議員,Joni嘅競選廣告主題係:「我在愛州長大,自少就閹割豬隻,去到華盛頓一定知道點樣切豬肉(pork)」,Pork就係美國政治名詞,泛指向不同階層派糖,爭取選民支持,Joni嘅意思係佢做咗參議員,會識得如何削減無謂公共開支。但Silverman感到大惑不解嘅係閹割豬隻與選民有乜關係,雄豬點解要閹?查究之下,方知道愛州係農業州,養豬場不容雄豬與雌豬交配,以免搞亂羣豬行為,難以控制,又因未閹嘅豬有腥味,豬肉有羶味冇人肯買,故要閹割之。Joni就係利用道地愛州民情,打動選民,遠在紐約嘅知識人自然難以明白!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載