蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年12月06日
馬上成為壹會員

北望樓 - 左丁山

到四季酒店參加「香港經濟峯會2015」,大門有車水馬龍之盛,匯豐銀行每年贊助此項香港經濟論壇盛事,當然大力邀請工商金融界別的重要客戶到場,各大商會的頭頭,旗下擁有不少企業,在香港做大生意,那有不與匯豐扯上關係的,怎會不應邀到場?此外還有港交所、恒基兆業的一眾高層,齊齊捧場呢。
行入四季大堂,想起日前有內地網媒報道,內地不少大款大戶,如傳出與落馬高官有牽連嘅消息,就會走得快,好世界,聞風而遁,唔係走去美加澳紐(因語言不通,離中國太遠),亦唔會走去星加坡,而係先走嚟香港,避吓風頭先,兼可以叫夥計到香港匯報,繼續指揮生意營運,一旦風聲冇咁緊,或者事情已告一段落,自己可以脫身嘞,先至打道回府,一年多以來,晉商就成為香港常客。
呢批暫時落難之人,未必個個有香港住宅,就算有,都未必有住在五星酒店咁好享受,於是大多數聚集在四季酒店,最鍾意有無敵海景嘅房間,一來望維景可以散心,二來窗外望往北方,消解懷鄉之情,故此內地稱四季酒店為「北望樓」咁講。
左丁山心中有少少疑惑,住在君悅、港麗、文華、香格里拉等大酒店都可以北望嘅啫,何以內地富豪偏愛四季?呢日趁參加峯會之便,捉住一位消息人士問一問,佢話:「內地網媒講北望樓,已經係舊料,不過內媒最近又炒作翻新啫,老實講,真係有好多內地客豪住四季嘅,主要原因係有地利,樓下就係IFC商場,買乜靚嘢,食乜名菜都有,來往機場最快捷,到地下搭機場快線都得,仲有呀,四季酒店有大量服務住宅(serviced apartments)供應,內地富豪來港避風頭,根本唔想在lobby check in,check out,以免俾人碰到,住serviced apartments夠晒私隱啦,而且仲可以包一層俾埋家眷隨員住㖭。」原來如此,但既然已經傳晒開去,難道中央中紀委會唔知北望樓嘅存在?消息人士話:「係囉,曾經有人話有北方人士每日在大堂咖啡室輪更,吼實外面呀!」哦!失覺晒,我地啲凡人確實唔知有呢樣嘢,四季樓下大堂嘅咖啡室素來好生意,一位難求,好彩約左丁山去嗰度飲茶嘅人,係講廣東話嘅啫,之不過廣東省政協主席朱明國已在11月被組織調查,相信佢與不少廣東商人及香港廠家有認識,北望樓開始有人講廣東話都唔奇。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載