› 選擇地區
三藩市
紐約
洛杉磯
其他美國地區
香港 台灣 北美
 
2014年12月20日

移民拍賣 - 左丁山

上月有朋自遠方來,乃恒生前輩賓架C,佢退休移民後長居墨爾本,好似唔識老嘅,在午飯飯局,問佢幾多歲,佢話:「今年七十八。」睇佢滿頭濃厚烏卒卒頭髮,十足退休前面貌,於是有人問佢:「係唔係白染黑呀?」賓架C立即否認:「天然頭髮,絕無花假!」或者外國空氣好,地方大,對個人健康大有裨益都未定,好似賓架L移居溫哥華三十年,每年十月中回港小住,呢日佢登門造訪講goodbye話:「我聽日返溫哥華咯,祝你聖誕快樂!」賓架L說話中氣十足,在威靈頓街上斜落斜,腳步穩,面不紅,氣不喘,冇人估得到佢已經八十五歲咯,係左丁山之啟蒙師叔(按:啟蒙師傅因飲酒太多,已逝世多年,令人痛惜)!
賓架C在飯局講墨爾本新事:「我所住社區,已經日漸普通話化,香港移民逐漸變為少數,有不少大屋起咗,動輒四房、五房單位,係專門賣俾中國大陸來客嘅,澳洲人崇尚獨立小家庭,邊會買四房、五房大屋吖。澳洲有移民配額,亦不斷提高金錢上限,但只要有配額,就有中國人買晒,邊理得金錢上限有幾高噃。」
十二月十五日,「國際紐約時報」有一篇報導各國競相出售公民護照,澳洲已推出「白金移民」,比「黃金移民」更勝一籌。原來澳洲早有Significant Investor Visa(重要移民簽證),俗稱黃金簽證(gold visa),外人投資五百萬澳元,等候四年就可永久居留澳洲。最近又推出Premium Investor Visa(俗稱platinum visa白金簽證),投資一千五百萬澳元,等十二個月就可以永久居留。黃金簽證已發出咗四百張以上,為澳洲引入二十億澳元投資,現在又有白金簽證,中國大戶更加開心。英國一樣出售公民權,外人投資二百萬英鎊,等五年就可無限期居留,最近又推出「快線移民」,投資者投入五百萬英鎊,只須等候三年,投資一千萬鎊就只等兩年,一半簽證由俄羅斯人及中國人攞咗。「窮人恩物」就係去馬爾他(Malta),盛惠六十五萬歐元,再加地產投資三十五萬歐元及債券十五萬歐元(而總共一百一十五萬歐元),就即刻可以得到公民護照,可自由選擇在歐盟28個國家居住。美國都有呀,攞EB-5投資簽證只需五十萬美元,價錢已有二十四年不變,八成EB-5投資者來自邊度?當然係中國啦!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載