› 選擇地區
三藩市
紐約
洛杉磯
其他美國地區
香港 台灣 北美
 
2014年12月23日

美帝再現 - 左丁山

美國過去一年,透過秘密外交,得加拿大、梵蒂岡之助,特別是教宗方濟各之私人游說力度,搞掂咗古巴政府同意復交,係奧巴馬政府外交政策一項大突破、勝利。現在係21世紀咯,古巴人還生活在20世紀六十年代,一旦全面向美國遊客開放,每年閒閒地有幾百萬美國人到古巴旅行,古巴裔美國人穿金戴銀咁衣錦還鄉,每三個月可以匯二千美元回鄉(現時只准匯五百),古巴生活方式唔逐漸資本主義化、追求物質化,點會有可能吖。好似今日北京,你話仲有冇人肯過番做又36,唔做又36嘅「均富」生活呀?
奧巴馬願與古巴復交,係信心表現。美國近月因國內經濟爭氣,GDP增長有2.9%,失業率降到5.8%,通脹低於2%,股市升勢保持,而且仲係全球大國之中夠膽結束量寬,將加息提上議程嘅唯一一個,相形之下,中國經濟增長率下滑,日本周身蟻,歐盟一籌莫展,俄羅斯因油價跌完又跌,拖累盧布大跌(今年跌咗45%,引起人民搶購日用品,好似我地在1983年到超市掃入廁紙),強人普京已硬不起來。美國聯儲局主席耶倫女士現在係全世界最有權力、影響力之人,只要佢下定決心話加息,全世界其他國家貨幣會立即大跌,全球投資資金會好似俾吸塵機吸管吸入咁,飛晒去美元本位,人人都要睇美國面色。
呢招叫做不戰而屈人之兵,美國憑經濟實力、資本主義制度之靈活性,再一次領導全球,打造成不折不扣之美國霸權。中國共產黨為咗對抗美帝,唯有口口聲聲進行經濟深化改革底下,行番胡溫舊路,實際量寬(央行減息放水),國務院密密批准大型基建項目(今年已有一萬億元人民幣項目獲批),與2009年溫家寶嗰套並無大分別,甚麼李克強經濟學,只是笑話。普京呢,俄羅斯經濟要靠油價每桶100美元去支撐,現在油價低到60美元以下,石油天然氣經濟體系已經出現裂痕處處,普京呢隻老虎好快會變成病貓,無力與美帝對着幹。不過呢度就是危險所在,普京會唔會被趕入窮巷,反咬一啖,引發局部戰爭,製造地緣政治緊張,谷高番油價呢?今天世界局勢明顯係美國獨大,中國製造業持續不振,A股靠放水支撐,俄羅斯負隅頑抗,有隱憂㗎,希望平安渡過啦。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載