› 選擇地區
三藩市
紐約
洛杉磯
其他美國地區
香港 台灣 北美
 
2015年01月10日

美國會否加息 - 左丁山

記者G十分有勇氣,聖誕新年期間帶埋七個月大嘅仔到美國旅行探親,雖然係去最近嘅西岸箒,但七個月大嘅嬰兒可唔可以適應長途旅行呢?事前真係唔知,係有不同風險嘅,對父母係一個考驗,小YY就堅持要等到個女夠兩歲先至肯帶女坐飛機,以免麻煩。
但記者G話全家都去旅行,唔可以留低兒子在港,而且佢根本唔捨得離開個仔兩個星期咁耐。OK,如期出發,坐爆到瀉嘅國泰航機,一切順利,到加州只見日日藍天白雲,空氣清新,環境遠勝香港,如是者玩到一月三日(美國時間),打道回府,點知去到機場之後,等咗一輪,先知道CX879(一月三日星期六中午12:15起飛)要延遲到下午六時起飛,即係等多六個鐘頭,等呀,等呀,又接到通知CX879再延遲至星期日凌晨3:15起飛,等多十個鐘頭噃,點搞好?嬰兒尿片用晒,奶粉食晒(後備一罐奶粉已check in),大人唔食啫,嬰兒要緊,急忙向三藩市親戚求救,飛車帶埋美國奶粉、尿片到機場增援,亦接埋佢地一家人返三藩市食晚飯。
如是者,在三藩市前後候機十六小時,飛機飛行十四小時,返到香港,記者G與老公要告多一日假,成個人散晒,點知七個月大嬰兒還是眼仔睩睩,真好彩!咁國泰人員有乜解釋呢?據講係一個機師臨時不適,替補機師要睡覺休息,充足電先至可以開工。記者G就覺得:同近期嘅機師薪酬談判有冇關係呀?大家都唔知。
記者G不失記者本色,在加州周圍留意經濟環境,發覺市面繁盛,零售店、餐廳每每貼出告示招聘(Help Wanted),租車公司竟然無車供應,因為一早俾人租晒,應該還車嘅人士亦不肯如期還車,情願再俾錢,油站汽油價格低於每加侖2.49美元(即係每公升5.1港元),刺激到汽車交通流量大幅度上揚。記者G話:「唔怪得耶倫話在2015年第二季可能會加息;乜唔係啫,通脹低,油價跌,周圍請人,失業率自然下滑,為加息創造條件。美元近來升得有道理,好彩我地用港元,去美國冇匯水蝕底嘅問題。」如果美國真係第二季加息,香港人買甚麼外匯都會蝕,唯有揸實港元。但匯豐梁兆基就話美國唔敢加息嘅,太強嘅美元會傷害所有美國跨國公司嘅盈利,傷害美國出口。梁兆基素來眼光好準,呢次唔會睇錯呀嗎?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載