› 選擇地區
三藩市
紐約
洛杉磯
其他美國地區
香港 台灣 北美
 
2015年01月29日

亞視可成MBA個案 - 左丁山

星期一飯局,成個會所逼滿人,行路出入要講聲:「唔該,借借。」賓架T話銀行多數在20至26號出糧,糧頭就荷包鬆動啦,故此每每在呢個時候到會所開餐。做銀行就唔怕無糧出,而且出糧有早無遲,可憐亞洲電視就啱啱相反,出糧有遲冇早,仲要欠糧㖭,依家已經係2015年1月尾,2014年12月份薪水仲未支付俾員工,而且極有創意地將公司欠薪變為員工欠債,手段之精,真係令人拍案叫絕,創世界先河。
適逢張總自上海來港,特別嚟參加飯局見吓啲校友,於是問佢一句:「張總,你在大學教MBA,有冇亞視欠糧呢一招?」佢大笑曰:「甘拜下風,真係唔識,人生永遠有嘢學。」大學商學院應該及早收集亞視近十年發展史及股權變動資料,寫成一個管理個案,交俾MBA學生上堂討論分析,一定係精彩一課,因為劇情豐富,曲折奇情吖嘛,中間新舊股東因誤解而結合,因了解而分開,爾虞我詐,涉及中港台三地商界文化差距,作風各異,及北京與特區政府之政治考慮,係人生難得一見㗎。
賓架P話特區政府受中央囑咐,依法治港,但在亞視一役,完全無視法規,令人大惑不解。第一,根據勞工法,欠僱員薪水一個星期,已足以被僱員控告,第二,公司董事如明知公司冇錢,嚴重缺乏現金流,出唔到糧,而仍然讓公司經營下去,會違反公司法之fraudulent trading(欺詐貿易),可以被政府檢控。不過呢,特區政府勞工處、商務局對亞視事件似乎聽唔到,睇唔見,任由亞視董事會及管理層玩新招,究竟如何依法治港?做公司董事唔好以為幾過癮,公司如有公然違規等事,官府動真格追究起來,所有董事都會成為被告。更有甚者,亞視連牌照費都拖,欠逾千萬元,政府又唔追索,有此等事情發生,特區政府對電子傳媒直情失去規範力啦,如果敢膽唔向TVB、商台、新城、有線、NOW等續牌,全香港會嘩然,通訊管理局任由亞視踐踏,仲有膽去管其他電子傳媒?香港自稱法治之區,不幸發生亞視事件,完全披露咗政治影響行政之現實,有人在中央撐腰嘅話,香港商界管治形式可以不理㗎!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載