› 選擇地區
三藩市
紐約
洛杉磯
其他美國地區
香港 台灣 北美
 
2015年02月03日

流感肆虐 - 左丁山

呢排流感肆虐,染上流感輕則發燒感冒聲音沙啞,重則連命都冇,幾得人驚,睇番報紙報導,由11月2日至1月24日,染上H3N2流感而死亡嘅人數,多達74人,上星期三中午至星期四中午之24小時內,已有死亡個案十宗,星期四至五再有七宗,不幸死亡人士多數係長者,由65歲至104歲不等,家中若有老人家患上感冒,千其唔好掉以輕心。
前年財務C在食飯時提起,佢仔細閱讀不少報紙報導嘅死亡新聞,發覺有好大比例係死於肺炎,而肺炎好多時只係併發症,因其他病症而帶動嘅,所以佢勸一班飯腳:「快啲去打肺炎針、流感針,年紀愈大愈要打針。」政府對打針有優惠,餐飲M有一次在北角行經衞生署診所,走入去打針,免費唔使錢,左丁山唔執輸,走上中建大廈搵許醫生打針,只需五十大元。
但親戚朋友之間,似乎比較少人相信預防勝治療嘅道理,冇乜邊幾個肯去打流感針、肺炎針嘅,此則令左丁山大惑不解。肥仔K前星期到旺角與朋友食泰國菜,飯後在彌敦道行街,話人多路塞,空氣混濁,跟住上火車站又唔覺意踩到別人啲嘔吐物,第二朝就開始喉嚨痛,跟住發燒頭暈,驚到以為自己染上咗H3N2,然後到佢嘅兩歲大外甥女與父母自沖繩島旅行回來發燒,兩三日後,肥仔K阿婆去馬會食飯,一起身離開座位就跌低,要子女扶番起身,馬會治療人員同佢量血壓,高到一百六十幾,第二日,肥仔K阿姨又因照顧阿婆緊張而血壓上升,於是三代人一齊去沙田第一城睇許醫生,到肥仔K好番嘞,而佢個七個月大女兒發燒,又係去睇許醫生,於是十零日之內,一家四代人輪流搵許醫生診病。睇足四代人,可能係家庭醫生診症生涯嘅一個紀錄。其實肥仔K自己只有幾個月大之時,已由阿媽抱住去睇許醫生,今日輪到佢抱住個女睇許醫生,當知時光如流水,過得飛快。許醫生在沙田第一城開醫務所,幾乎與第一城落成入伙同步,可謂見盡第一城之變遷,樓價由1980年開售時之呎價(建築面積)一千元,佳寧政治風暴時跌至六百元,之後一路上升至今天之過萬元一呎,可見傳統智慧就係買樓要長揸,沙田第一城呢個典型香港中產階級屋苑,可當見證。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載