› 選擇地區
三藩市
紐約
洛杉磯
其他美國地區
香港 台灣 北美
 
2015年02月05日

RAE 2014 - 左丁山

大學教育資助委員會(UGC)在上星期二(1月27日)下午開記者招待會,發佈2014年研究評審工作結果,大學中人稱為RAE(Research Assessment Exercise),呢項工作評審咗2007年10月至2013年9月共六年嘅八大院校嘅學術研究論述,有4400名學者(助理教授級以上),共提交16500份研究成果,由UGC組織咗13個評審小組,召集307名學術專家(七成來自海外,有澳洲、奧地利、紐西蘭、新加坡、西班牙、瑞士、中國大陸、台灣、加拿大、英國、美國等各地學術專家在內),評審過程嚴謹,無可能有偏私成份,過去UGC在1993、1996、1999、2006年都搞過RAE,曾經每三年辦一次,現時每六年辦一次。
完全獨立嚴謹嘅學術評審,本係好事,今年竟然因為事先有人故意洩漏消息俾文匯報,令到別有目的人士可以組織文章攻擊香港大學法律學院,將RAE政治化,幾令人遺憾。UGC主席鄭維新係小心謹慎、行事低調、對學術政治化非常敏感之人,佢與UGC應無可能洩漏資料,主持RAE之前研究資助局(RGC)主席錢大康教授係港大常務副校長,接任嘅華雲生教授係中大常務副校長,兩人同是世界級電腦科學專家,亦唔會刻意抹黑港大,然則文匯報在上星期一(1月26日)之獨家報道,料從何來?按道理,教育局高層可能事先得到報告,但記者走去問教育局,新聞組人員答咗等於冇答。
過去有人唔多滿意RAE嘅,認為(一)外來和尚(外國學者)佔領評審小組,不明白本地情況;(二)三年一評審令本地教授覺得有太大壓力,掛住寫論文,唔注重教書;(三)三間研究型大學資源較多,對其他院校唔公平。呢啲訴苦,是否成立?只有第三點較為實在,所以UGC已將RAE由三年一次,改為六年一次。六年喎,有足夠時間交論文著作啦。至於第一點,香港要打世界波,必須以世界級視野及水平為準,唔得閂埋門,自己評審自己,故此邀請海外專家乃事所必然,況且還可以清除熟人偏私之可能性。至於第二點,科大、港大、中大無疑擁有較多資源,但如果運用得宜,其他五間院校都有機會在專門項目佔一席位。2014 RAE結果就證明咗呢一點,明日本欄會引用RAE報告講一講。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載