› 選擇地區
三藩市
紐約
洛杉磯
其他美國地區
香港 台灣 北美
 
2015年03月17日

面試AIA - 左丁山

午飯時碰到半退休專業人士F,問佢有何大計,專業F話:「冇乜噃,仍然留在公司做顧問,每日返工,只不過將好多重要事情都交晒俾啲拍拿做咯,我只在策略問題上俾吓意見,剩餘時間就思量緊如何幫助年青人創業,希望打破地產詛咒。中東、汶萊等國有大量石油儲藏,享受咗多年石油財富,人民不事生產,石油係佢地嘅福蔭,亦係佢地嘅詛咒,西方人就係咁樣講嘅。香港三十幾年來,逢買樓都發,過份借貸者除外,我有好多老友律師會計師每隔三四年就買多一層樓,現在人人身家過億,於是香港人除咗投資地產之外,乜都唔想做,我認為呢樣係地產詛咒。我現在全無財務負擔,俗語講可以印印腳,我想推動一啲志願計劃輔導青年人創業,挑戰未來,迎接新科技!」
好彩識咗佢好多年,知道佢並非隨口噏之輩,而係一個有擔當之人,否則會以為佢係一個熱血青年。問佢他日如何揀蟀創業,是否一定要選科技專科畢業人,佢話:「有科技底子當然好,但據我多年聘請員工及公眾服務經驗,我睇人選人最注重三個字母,就係AIA。」友邦保險?唔係呀,問清楚啲,第一個A就係Attitude(態度),畢業生/求職人面試時最緊要態度正確,說話誠懇誠實,識就識,唔識就話唔識,唔好以為可以吹牛過關。專業F有一次面試某君第一次之後,好欣賞,第二次面試就帶佢去高檔餐廳食餐,求職人對專業F態度非常有禮貌,但對侍應就俾面色人地睇,專業F看在心裏,就將此名求職人除名。
第二個I就是誠信Integrity,要仄清楚求職人嘅品格,及推薦人(referee)文字所寫之介紹,申請人獲聘請,入職後如在誠信上發生問題,一個不留。
第三個A係Ability(能力),新畢業生嘅能力係靠估,但在試用期間可睇得到,有經驗員工則有往績可尋,可以問清楚。專業F話:「假如我滿意申請人之AIA,即使職位唔啱佢,我亦會代佢想辦法或推薦佢俾老友公司,年青人上嚟見工,第一關就係Attitude,態度唔啱嘅話,立即除名,費事嘥時間!」好難話專業F講得有無道理,但佢嘅業績確係令人佩服嘅,佢開業時只在中環邊緣租一間細office,二十幾年後在中環心臟地段甲級商廈租完一層又一層,顯見佢歷年請夥計、揀拍拿確係有眼光,經得起時間考驗㗎。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載