› 選擇地區
三藩市
紐約
洛杉磯
其他美國地區
香港 台灣 北美
 
2015年03月19日

打吡馬後炮 - 左丁山

沙田陳太打電話嚟報喜:「喂,多謝你呀,星期日打吡大賽,我跟你貼士買,贏咗二千五百蚊,非常高興,得閒請你飲茶。」左丁山嘅打吡貼士(三月十五日本欄)明明輸咗,點解沙田陳太會贏錢?陳太話:「我唔識咁多投注方法嘅,注碼少,買熱門唔慌多錢收,我見你有寫10號醒目名駒係四重彩大冷腳,但我唔識買四重彩,於是去投注站用10號做膽拖番你在專欄講嗰幾隻馬,即係1、2、3、4號加埋9號11號14號,一共七隻,買一拖七,只買位置連贏,每注十蚊,總數七十,估唔到會收番二千六百一十五蚊,笑到我暈。」
唉,真係同人唔同命。左丁山叻得滯,臨場見到莫雷拉氣勢如虹,贏完又贏,連第七場隻步步友被困死內欄,佢都可以奪圍而出,後上贏美麗之星,第九場打吡,唔捧佢直情係違反正常賽馬邏輯,首先就捉住佢隻6號精彩鬥士,然後聽到世界騎師王莫雅因班機延誤,在第九場打吡大賽前唔夠兩個鐘頭先至到埗,由馬會專人急送佢到馬場,如此勞碌,為咗乜?跑慣碼頭之人,都係要搏殺攞獎金箒,於是就選埋9號直震撼,6、9食全餐。本來想要埋老友記Terry隻戰利品嘅,但潘頓是日(到第九場為止),表現一般,騎第4場金龍,第5場威利大大兩隻熱門,三甲不入,左度右度都係唔夠莫雷拉穩陣,於是只係揀1號戰利品做腳。
嗚呼,結果戰利品順利取勝,直震撼力拼得第二,精彩鬥士跑到第十一,於是發財美夢就此破滅,而醒目名駒跑入第三名,假如要1、9雙膽全餐,就會收番幾萬銀,真正慘情,倒不如好似沙田陳太咁,用最冷嘅10號醒目名駒拖番轉頭,仲收錢收到笑。跑馬就是這樣的,氣頂氣滯悶氣攻心之餘,肥仔K來報話馬會罰3號酷男騎師田泰安阻住6號精彩鬥士,逼到6號無路可走,罰停賽三天。哦,原來如此,即是田泰安做犧牲品,自己跑內線困住莫雷拉,等潘頓騎同屬蔡約翰馬房嘅戰利品在外欄殺上。田泰安咁講義氣,停賽三天後,可能有好回報,佢復出後再騎蔡廐馬匹,要多多留意噃。恭喜Terry霍贏打吡之餘,相信一位最悶嘅騎師就係韋達,事關戰利品與直震撼都係佢嘅基本座騎,因要騎大富豪潘蘇通隻大印銀紙,冇咗贏馬獎金,痛失名與利,又係要等「回報」啦!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載