› 選擇地區
三藩市
紐約
洛杉磯
其他美國地區
香港 台灣 北美
 
2015年03月20日

名駒可為港揚威 - 左丁山

證券界資深人物、壹傳媒獨立非執董霍廣行Terry贏咗今年打吡,左丁山雖然抵死唔搵佢隻馬做雙膽之一,由贏變輸,但都好為老友記高興。二十幾年前Terry在金英證券掌舵之時,大家已經相識,佢現在自己開辦證券研究公司,自己投資、自得其樂,佢養馬多年,從不以極高價買馬,好似隻戰利品咁,贏埋打吡之後,至今七捷,贏馬獎金由四百五十幾萬急升至約一千五百萬元(打吡獎金有一千零四十萬),應該係馬價嘅幾倍,爭奪打吡14匹馬之中,相信戰利品係來價最低嗰兩三隻,所以話養馬不是有錢就可以贏晒,否則嘅話大富豪潘蘇通出兩隻馬:大印銀紙與王者無敵豈非可包辦冠亞軍?
戰利品贏打吡唔奇,最奇係配上騎師潘頓。潘頓與練馬師蔡約翰素來冇「馬上交情」,今年全季未騎過蔡約翰嘅馬,只不過「萬能插蘇」韋達交際手腕一流,與不少練馬師有交情,剛啱呢場有蔡約翰嘅戰利品,高伯新嘅大印銀紙、直震撼、王者無敵,一共四隻馬都可以任韋達揀。一位冇份參賽嘅練馬師曾經講過:「潘蘇通先生豪爽、闊綽,令人難以拒絕,佢想韋達騎大印銀紙,韋達好難推嘅。」咪係囉,就算知道戰利品係十四匹馬之中,評分最高,跑平磅賽有便宜,韋達都係要放棄嘅嘞。於是蔡約翰在無人可揀情況下,都要邀請潘頓上馬。哈,贏咗噃,以後隻馬會唔會俾番韋達騎呀?雖無交情,也要講人情,蔡約翰對南華早報記者講:「潘頓既然贏咗,以後都會搵番佢騎嘅,除非佢唔制啦!」自動放棄就好難咯,做騎師最緊要爭取優秀座騎,打吡冠軍馬豈有放手之理,莫雷拉已有馬王級靚馬在手(如步步友、威爾頓),潘頓欲要爭雄,天跌落嚟嘅戰利品仲唔擁抱入懷咩!莫雷拉騎開隻步步友係馬場怪獸類,在香港跑千四米至千六米,所向無敵,每仗贏來,皆不費吹灰之力,究竟還有多少潛力,大家靠估,馬主李福鋆(著名牙醫)係李家中人,係李國寶疏堂阿叔,養馬旨在過癮,獎金視若等閒,既然擁有呢隻靚馬,香港好多馬迷幾希望李先生送馬出外爭雄,到皇家雅士葛、杜拜大賽一顯威風,為香港爭光,步步友若跑日本安田紀念賽(千六米),應該係大熱門㖭,希望李先生考慮吓。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載