› 選擇地區
三藩市
紐約
洛杉磯
其他美國地區
香港 台灣 北美
 
2015年03月31日

曼谷懷舊 - 左丁山

在曼谷行街,到各大商場自然十分容易,但行得多,未免覺得熟口熟面,左太忽然間有懷舊之念,於是吩咐司機(我地租咗一架七人小巴,司機識講普通話)去耀華力路行一行。耀華力路就係唐人街,由四季酒店前往,本來路途不遠,但曼谷塞車無日無之,星期日下午亦不例外,司機在路上左穿右插,行足近40分鐘先至到達,在Hotel Royal Bangkok(林真香對面)門前停下,一落車已經覺得街道行人擠逼,路面凹凸不平,街邊檔攤林立,空氣污染,雜亂噪音不絕,都幾難頂。周圍望幾望,市容與建築物真係五十年不變,夠晒保育,香港的保育團體不妨到耀華力路一遊,睇吓如何保持街道幾十年都係咁落後,與四面佛一帶完全不同。唐人街點解數十年不變,極少新樓?諗極唔明,想來必與城市發展規管有關。
左太仲要貪過癮,經一條橫街行去另一條唐人街石龍軍路,呢條橫街滿是山寨貨雜貨鋪,做批發多過做零售,兩旁店鋪貨物堆出街上,中間剩番一條小路俾人行,假如是但一間店鋪發生火警,救火車根本無法進入,肯定會發生人踩人事件,一諗起就驚,急忙拖住左太以佢嘅最快速度(其實都好慢)逃離窄巷(泰文稱之為Soi),附近又有兩條小街人頭湧湧,店鋪全部賣小童玩具如山寨叮噹等等,睇到眼花撩亂。
成身大汗之下,走返去酒店門口,司機已在附近等候,懷舊完畢,左太方知腰酸腳痛,塊面都黑黑地,於是想去Spa按摩,叫司機直奔有四十六年歷史嘅Dusit Thani大酒店,酒店大堂清靜少人,入去搵到「健康中心」(Health Centre),就有美女相迎,話明按摩兼Spa一小時收費2000銖(即唔夠港元五百),真係抵玩之至。不過,要等到六點半後先至有人有房!邊度等得咁耐吖,唯有走去大堂在咖啡室飲杯清涼雞尾酒,成個人鬆晒。五點半之後,返Anantara酒店,唔塞車,只需行車五分鐘就返到(曾經試過在黃昏時候,同一路程行走一小時),家人來報,佢去咗隔鄰Grand Hyatt商場理髮,只需五百銖,平到佢咭咭笑,因為師傅手勢好,服務一流,在香港絕無可能如此美而廉也。酒店附近見到一個市區樓盤廣告名為Maestro,最細單位(300餘平方呎)售價450萬銖(約108萬港元),睇到家人心郁郁,一百萬港紙,在香港買樓,連首期都未夠,在曼谷市中心可以買到一個小單位(低層),又係幾吸引嘅!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載