› 選擇地區
三藩市
紐約
洛杉磯
其他美國地區
香港 台灣 北美
 
2015年05月07日

簡體字月刊 - 左丁山

《國際紐約時報》自五月四日起隨報附送一本生活雜誌,叫做「國際紐約時報月刊」,第一期內容有世界時事、歐洲性教育、國家閱兵、商業與財富、加州大旱、文化與生活等等。最大特色係乜嘢呢?原來係全部用簡體字。俾邊個睇呀?出版人潘佩霏Helena Phua致函「國際紐約時報」訂戶(左丁山係其中一位),信件當然係用英文寫啦,潘女士話呢本月刊係:a general news and life style magazine in Simplified Chinese available in Hong Kong & Macau,換言之,呢本雜誌(月刊)只會在香港及澳門附送,既然係咁,點解要全部用簡體字呢?左丁山本想一看,但睇落內容多數係繙譯紐時嘅舊稿,冇新嘢,剩係睇一篇文章標題「李光耀之后」,已經唔開胃,李光耀有冇皇后呀?係「李光耀之後」先至啱吖嘛,呢位Helena Phua(似係越南姓氏)女士唔知識唔識中文嘅。
如此月刊若在內地發行,也就算數了罷,偏偏大陸又唔俾佢入,只可在港澳隨報附送,以後每個月紐時讀者又多一本印刷品丟落字紙桶。
掃走呢本月刊之後,接到三藩市老友投資L嘅電話,原來佢到咗香港,有商業伙伴同行,剛好是日無約,於是約食午飯。投資L話位美國朋友係素食者,所有可郁動嘅生物都唔食,只食蔬菜,幾乎俾佢考起,但記得公關大姐大提過灣仔家全七福(杜老誌道群策大廈)除咗傳統菜式之外,新派齋菜冇得頂,碰巧投資L住在銅鑼灣一間酒店,啱晒。個幾鐘頭之後,大家就在家全七福見面,投資L介紹,美國人係醫學博士B(柏克萊畢業),專門做醫療儀器之研究開發,非常先進。左丁山對醫療儀器認識有限,講都唔會明,點知博士B即刻叫左丁山拿出iPhone上YouTube,打VIRF Fanny的日記,就搵到一套紀錄片,講一位國泰空中小姐Fanny患上腦血管瘤,四處求醫,卒之在威爾斯醫院搵到中文大學教授余俊豪(Simon Yu)為佢施微創手術割除腦血管瘤,完全恢復正常的故事。套片又幾感人,技術層次連左丁山咁笨嘅人都睇得明, 但有乜意思呢?投資L話:「嗱,套儀器medical device就係博士B研發出嚟嘅嘞!」博士B話香港醫生勇於使用新儀器,技術領先全球,余俊豪教授直情係世界先進。咁博士B依家又搞邊科?投資L話唔講得住,要去北京上海探吓路先!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載