› 選擇地區
三藩市
紐約
洛杉磯
其他美國地區
香港 台灣 北美
 
2015年05月12日

老將長春 - 左丁山

NBA季後賽正進行第二輪比賽,西岸四隊對決打得燦爛,特別好睇,東岸四隊實力差少少,今季總冠軍如果唔係西岸球隊奪得,籃球之神實在係偏心。
西岸四隊之中,LA快艇對曉斯頓火箭,曼菲士灰熊對金州勇士,實力旗鼓相當,幾難分高下,其實左丁山最捧聖安東尼奧馬刺,好可惜吖,第一圈就對住LA快艇,兩虎相遇,必有一傷,卒之打到第七戰(美國人最鍾意講嘅Game 7)決勝負,去到最後一秒,由上帝附體嘅基斯保羅三世(CP3),明明已經傷咗大腿筋,竟然還可以上籃射入擦板球,就此氣走馬刺。當日早上,見習生Y、肥仔K等晨早到左丁山屋企睇直播,佢兩位都擁快艇,嗌到聲震屋瓦,令左丁山呢位老嘢在球賽第四節最後一秒啞然無聲。
馬刺嘅鄧肯(Tim Duncan)係Wake Forest大學畢業生,1997加入NBA(當年選秀狀元),至今十八年,對快艇一役,雖然年紀已有39歲,在NBA屬於老將廉頗一類,但是役竟然取得二十七分,美國球評家讚佢打到似返回29歲!最後敗在CP3手上,CP3就係鄧肯之Wake Forest師弟,莫非早有注定?呢間大學在NBA只有兩位球星啫噃。CP3講過佢十零歲時已在電視見慣鄧肯贏完又贏又贏,似長春不老,估唔到輪到佢呢位小師弟送鄧肯提早唞暑。
下一季鄧肯40歲,是否仍有活力呢?是一個謎,無論如何,馬刺隊十八年來已成為NBA一個傳奇,同一位教練卜普域治,同一位主將鄧肯,加上兩位常青大配角真勞比利與東尼柏加,四個人合作無間,和洽無爭風呷醋,無爭人工,再加上其他綠葉球員,咁就令馬刺成為NBA嘅一個維持最久嘅「朝代」,五奪總冠軍,年年入季後賽,馬刺嘅前球員及助教到其他隊伍做教練大受歡迎(如金州勇士教練Steve Kerr就曾效力馬刺),美國所有球評家一致讚揚馬刺為模範隊伍,敬老任用舊功臣之餘,兼可以不斷「微調」陣容,以銳利眼光,引入新秀(如李安納)補充活力,冇話好似其他球隊咁,盲目追求年輕化,揚棄年老有經驗嘅功臣。對馬刺來講,隊有三老,如有三寶,由三老帶領新人,就年復一年咁打出好成績。美國人偉大之處就係一方面敬老,另一方面係會有新人快速登場,唔會俾前輩窒死,金州勇士係一支年青球隊,朝氣蓬勃,今屆係有機會取得總冠軍嘅,打籃球如此,企業經營何嘗不然,以老帶新,彼此和洽,係最高管理藝術。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載