› 選擇地區
三藩市
紐約
洛杉磯
其他美國地區
香港 台灣 北美
 
2015年05月14日

房價高阻經濟 - 左丁山

昨日講起公子L到紐約參加細仔之哥倫比亞大學畢業禮及本港設計大師Steiner到三藩市接受當地榮譽藝術博士學位。紐約與三藩市位於美國一東一西,可能係兩個美國最重要嘅城市,紐約係金融重鎮,三藩市則位於矽谷科技中心地帶之北,最新科技發展消息多在此發佈,於是咯喎,呢兩個城市長期興旺,富人集居,房地產價格非常貴,普通美國工人絕對負擔唔起。
加州大學柏克萊分校教授Enrico Moretti與芝加哥大學教授Chang-Tai Hsieh(應該係姓謝,台灣沿用之國語拼音)聯手做咗一個研究,分析美國200個城市之GDP與房地產價格及勞工移動嘅資料,得出一個結論,就係紐約、三藩市嘅工人生產力最高,生產力增長亦最高,但竟然一齊拖慢美國總體GDP嘅增長率,原因一字咁淺(香港人最明白),兩地(三藩市延伸及矽谷至聖荷西)嘅房價太高昂,令其他州份工人難以遷入,兩地之總就業量難以增加,於是拖慢咗經濟增長,同時扯住美國經濟後腿。紐約及三藩市雖然有租金管制,但住在租管樓宇嘅人士,幾乎從不搬遷(例如昨日講及之左丁山老友顧問K,住在三藩市中心豪宅區三十幾年,月租遠低於市價,幾大都唔搬),於是年青人及外來人口極難移入。呢兩位教授指出,紐約及三藩市如能放寬興建新樓限制,增加房屋供應,會對美國有益。但當地人士立刻指出,限制有限制嘅理由(例如環保、租管,人口密度不致太高),難以放棄。
香港嘅環境,似乎與呢兩位教授嘅研究估算一樣,市區樓價太貴(上環史丹頓街一個實用面積三百餘呎單位喊價六百幾萬),基層工人望樓興嘆,故此港島區好缺乏基層員工,年青人怨聲四起。但想話在港島區起多啲樓?又有好多聲音反對啫,例如在堅尼地城興建公屋就受到阻撓,理由係交通負荷不了。一位留矽谷多年嘅經濟學教授講俾左丁山聽,加州環保團體嘅影響力好大,剛好適合民主黨、自由派嘅理念,故此加州長期由民主黨掌權,加州推出不少全美最嚴格嘅環保條例。佢曾經研究過加州環保團體之資金來源,發現到捐款好踴躍嘅,就係地產發展商!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載