› 選擇地區
三藩市
紐約
洛杉磯
其他美國地區
香港 台灣 北美
 
2015年05月17日

鼓勵創業 - 左丁山

最新商業潮流就係講創業,特區政府以為鼓勵青年人創業係收買人心,收編青年,減少示威嘅一個方法,呢個辦法未必錯得晒,但不可不知,有興趣創業嘅青年多數係攻讀理工科、商科嘅學生,而示威搞社運嘅青年多數係社會系、政治系、文化系或文學院嘅學生,呢班青年多談社運,少談創業,特區政府即使大力支持青年創業,仍難以降低、減少社運示威壓力。
內地亦係鼓勵創業,李克強居然親身到訪北京中關村(青年科技創業聖地),在咖啡室飲咖啡,以示親民兼向創業人士打氣,效果係點?咪係刺激股市創業板狂升,超過十隻「妖股」出現,即刻嚇親中證監,要叫有關人等傾一傾,自律吓,唔好炒到咁癲。炒股雖然過龍,但創業板股票大旺特旺,會產生一個副作用,就係刺激不少人創業,發夢自己會隔幾年就變成馬雲、馬化騰、朱克伯格,即使冇咁威威,正是寧為雞口,莫為牛後,做個成功小老闆好過在大集團做一個聽老闆命令嘅甚麼總監吖。
香港雖有窮人,有人生活在貧窮線以下,但呢個城市最不缺乏嘅就係金錢,政府已為青年發展基金注資三億,支持青年創業,馬雲親捐十億,支持香港青年創業,另外有不少創投基金,私募基金在港提供種子資本,閣樓資本,上市前(pre-IPO)投資,故此銀紙不缺,最緊要有一套完整創業計劃及創新主意/技術,搵人投資比三十年前(左丁山做創投之時)容易得太多了。創製凌空拍照無人飛機嘅大疆,創辦人科技大學校友汪滔只係三十歲出頭,最近又獲Accel Partners注資七千五百萬美元,公司估值近80億美元,即使在十年前,還是天方夜譚。
中文大學幾年前就成立一個創業研究中心,輔導學生/校友創業,去年與Google合作辦一個創業實習計劃。幾個月前,中大校友承傳基金決定舉辦一個「中大創業日」(CUHK Entrepreneur Day),在5月22日星期五假火車站旁的鄭裕彤樓舉行,上午十一時舉行開幕禮,由沈校長及三位校友主持,即商務及經濟發展局副局長梁敬國,貿發局副總裁葉澤恩,和成功創業家林曉鋒博士,5月23日則有全日活動,展出中大校友不同的創業計劃40餘項,及創業校友經驗講座,有吳自豪、王幹芝、劉小鷹、胡景邵等等等,歡迎各界人士到場參觀、交流考察。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載