› 選擇地區
三藩市
紐約
洛杉磯
其他美國地區
香港 台灣 北美
 
2015年06月03日

李達三捐中大一億 - 左丁山

朋友退休後,某日讀書,忽覺右眼模糊,初以為眼鏡染污了,除下眼鏡一望,知道眼鏡清澈無瑕。再照鏡望自己塊面,右邊睇得唔清楚,心中暗叫不妙,急忙落樓搵相熟眼醫求診,眼科專家同佢驗咗一輪,懷疑係眼球內血管爆破,叫佢急急去眼科醫院再驗,唔好彩,檢驗結果就係爆咗眼球血管,瘀血形成血塊,阻礙視力。
點醫?眼科醫生話可以一個月打一針,向右眼打,每針藥費超過一萬元,個個月都要打,唉吔,退咗休先至咁搞,長期負擔幾重噃。朋友打電話嚟問左丁山有冇識得甚麼專家可以醫治呢樣奇難雜症,例如中醫、針灸、神醫……等等,老友有命,左丁山自然周圍去問,至今不得要領,各界讀者如知道,請指教。
當西醫話某種病無乜西醫方法醫治,或有,但醫藥昂貴到極之時,我地香港人好自然咁就會諗到中醫藥有冇辦法。左丁山曾眼見西醫老友話醫骨刺無斷尾方法(手術剷除後可再生過),但有中醫話得,一位女士連吃三個月中藥之後,頸部骨刺竟然冇咗,左手不再麻痺無力,無法子唔服。因此覺得傳統中醫藥值得深入研究、科學化,在香港發揚光大,與西醫西藥互補長短,作為比較廉宜一啲嘅長期醫療體制。
中文大學中醫中藥研究有幾好聲譽,譬如研發出嚟嘅三冬茶,對預防感冒,確係幾有用嘅。做咗幾十年中大新亞書院校董,直至約三年前因年滿九十歲先至唔肯再做校董嘅李達三博士,近日慷慨捐贈一億元支持中文大學嘅中醫藥研究,呢一億元會成立一個「李達三葉耀珍教育發展基金」,每年衍生嘅收益,用一百萬元支持一個「李達三葉耀珍獎學金」,其餘收益撥作中大中醫藥教育,研究與發展。中大為答謝李博士,會命名一個「李達三葉耀珍中醫藥研究發展中心」及將大學圖書館新翼命名為「李達三葉耀珍伉儷樓」(按:中大已有李達三樓多年)。李先生縱橫商界七十年,左丁山初入銀行做事之時,銀行已有一個大客,叫做Roxy Electric(樂聲)專門代理日本聲寶牌電器產品,就係李先生擁有嘅,李先生在香港與新加坡擁有不少事業,如酒店、地產等等,今年分別捐錢俾城大、港大、中大,各一億元,直情係商人行善典範。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載