› 選擇地區
三藩市
紐約
洛杉磯
其他美國地區
香港 台灣 北美
 
2015年06月13日

與畢菲特共膳 - 左丁山

世界股神畢菲特自2000年起,為了籌款捐助三藩市一個NGO組織Glide Foundation,每年在ebay拍賣一個午餐,最高出價人士可以同畢菲特食晏,食材當然唔係中式鮑參翅肚,亦唔係法國、西班牙嘅米芝蓮三星廚師下廚炮製嘅美食,而係一間美國牛扒連鎖店Smith & Wollensky捐出嚟嘅set lunch。籌款所得用於Glide向三藩市貧苦大眾露宿者提供食物及庇護,啲錢係用得其所嘅。由2000年到去年為止,畢菲特已為Glide籌到二千萬美元,當然有人話,畢菲特係美國次富,二千萬美元對佢嚟講,濕碎到極,自己一年捐晒佢都得啦,何必要拍賣一餐午飯?呢呢,美國人信奉自由經濟,知道甚麼叫做奇貨可居,與畢菲特一齊食飯聽佢講話,係一件值錢商品,價格可由拍賣決定,用此方法搵善款,係好合乎資本主義原則嘅手法。
今年勇奪「食飯權」嘅係中國公司,深交所上市嘅「大連天神娛樂」,以今年最高價2,345,768美元投得,呢間公司嘅法人代表叫做朱曄,諷刺嘅係,公司曾被中央電視台指稱「操控市場交易」,尚在停牌階段,唔怪得俾內地網民諷刺為:炒一次漲停板,二百三十萬美元食飯費就搵番嚟。
食餐飯,又唔係食靚嘢,有冇價值?用到二三百萬美元中標,是否值得?幾難講,但有一位先生在強國人沒有富起來的時候,曾經兩次中標(幾十萬美元啫),有幸與畢菲特共晉午餐兩次,就覺得抵到爛,呢位先生本是對沖基金經理,叫做Ted Weschle,與畢菲特吃第二次午餐時,畢菲特竟然挖佢過檔巴郡,現在有機會成為巴郡投資負責人,當畢菲特真係退休之時!即使冇Weschler咁好彩,一位Spier先生話與畢菲特一齊食麵包,令自己身價倍增,佢話呢個世界並非公平世界,人地睇你同邊個做friend,睇得好緊要,有人知道佢同畢菲特吃飯之後,就願意同佢交朋友!呢類「佛面效果」(唔睇僧面睇佛面)非常重要!Spier與畢菲特吃飯之年係2007,出價65萬美元,好平啫,佢話如果捐呢筆錢俾耶魯或哈佛,連紀念銘牌(plaque)都冇一個,最多同一位學院院長(Dean)食餐飯而已!與Spier一同見畢菲特嘅有一位小女孩,當年12歲,現在已是大學生,又聽到一啲乜嘢一生最有用嘅忠告呢?就係:一生最重大嘅決定,就係同阿誰結婚!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載