› 選擇地區
三藩市
紐約
洛杉磯
其他美國地區
香港 台灣 北美
 
2015年06月17日

否決831方案 - 左丁山

今日全城矚目嘅大事當然係立法會辯論2017特首普選之政改方案,自2014年8月31日中國人大常委會決定了2017普選特首之框架,等於一錘定音,香港人再無修改該方案(831方案)之權利與力量,中共一黨專政下之中國政府有一個特點,就是由中央政治局常委決定了嘅政策,交由政府執行,人大常委會只係一個「諮詢工具」,人大常委之重要決策、決定、方針、方案、法規,事先均由黨中央首肯至掂,所謂有一個討論過程,其實就係一個「說明過程」,我講,你聽,直至你「願意被說服」為止,如講幾次,你仍然「不願意被說服」,夠膽提出與中央不同口徑嘅意見,你就係反對派。
香港特區政府之三人政改小組就係老早「願意被說服」,然後再企圖說服香港市民支持831方案。之不過吖,政改三人組並不懂政治交易,林鄭月娥最熟扶貧,對政治不大懂,袁國強精於法律,叻律師常陷入法規條文陷阱,不明白政治冇法律咁死板,至於譚志源,長期在內地及政制事務局工作,可能熟悉政治一啲,但在李飛、王光亞、張曉明面前,幾時輪到佢講嘢?
如此這般,政改三人組雖有大量公共資源配合,可發動各種龐大廣告攻勢,仍然在民意爭奪戰方面,失效失敗。
林鄭月娥天真到以為可以搞「真溝通」,叫埋泛民議員在五月三十一日上深圳見李王張三人,可能以為可以攞到一兩分讓步,返香港宣傳,點知李王張三人完全不賣賬,說話似冰冷鐵板,豈止泛民議員受辱,連建制派聽到,都暗呼不妙,林鄭三人組呢次可謂枉費心機,果其不然,三大學聯合滾動民意調查顯示,五月三十一日之後,支持831政改方案嘅程度快速下滑,由47.9%跌至6月7日之41.7%,反對方案嘅支持率由5月31日之34.5%急升至6月7日之43%。李王張三人之強硬口風顯然係「趕客」,民意如此,泛民議員如要轉軚支持831政改方案,去邊度搵藉口呀?莫非真係有威逼利誘呢回事?五千萬元至一億元一張票?呢啲傳言,左丁山認為不可信,反而李王張三人係故意在最後關頭特別強硬,係一種逼使泛民不可轉軚,一定投反對票嘅策略。中央根本就唔想香港有特首普選及立法會普選,搞個方案出嚟俾立法會否決,就有藉口講:「我俾民主你地都唔要,以後唔搞嘞!」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載