› 選擇地區
三藩市
紐約
洛杉磯
其他美國地區
香港 台灣 北美
 
2015年06月18日

慳電難 - 左丁山

俗語有云「未食五月糭,寒衣不敢送」,以過往經驗睇,此說並非全無道理。但用諸於今年,就極不合時,自五月初開始,本港氣溫似乎長期高企,前幾排有大雨落,還不大覺得,一到陽光普照,萬里無雲,就熱到嗌救命,屋企唔開冷氣唔得。
本想為了慳電,慳電費,每日要捱到下午一時後先至開客廳冷氣機,一路開到晚上十時許,客廳熄機,只有睡房(晚上七時開機)先至繼續開,如此控制部冷氣機每日開動不超過十二小時,自覺對得住環保原則嘞啩?但老婆就大聲抗議:「你自己坐響度睇報紙雜誌就可以忍得住熱啫,我成屋周圍行,執拾衣物及做家務,淨係開住兩把風扇,想熱死我咩!」
於是乎,冷氣機長時間開動,今年六至十月嘅電費單相信會高到破歷史紀錄,冇眼睇!聽講前天文台台長林超英係「環保聖人」,對夏天冷氣呢回事,可以話唔開就唔開嘅,左丁山自問係凡夫俗子,恕難仿效咯。
好彩香港唔係菲律賓,市民開着冷氣機唔會導致停電,上次有拳壇世紀大戰,由菲律賓國寶柏奎奧大戰美國韋達,菲律賓全國人民圍在電視機前睇直播,能源部長就呼籲國民睇電視時又開着冷氣機,耗電量太大,超出國家電力供應嘅負荷,應於同一時候熄咗個電雪櫃。嘩,雪櫃入面啲食物咪好快腐爛?另一方面,不久前印度天氣熱,溫度急升,某邦(即某省)熱死數以百計人士,新聞講及如果當地有足夠電力,人民可以開冷氣機嘅話,就唔會熱死咁多人。
我地香港人從來唔會諗起睇世界盃轉播時唔好開冷氣機或為雪櫃熄電,總之幾時鍾意用電就用電,電力如空氣一般,隨時隨地都有,一㩒掣就嚟,而且唔多慳電㖭!政府叫我地節省用電(即年復一年減少用電,一年比一年少用),左丁山一家做唔到,有啲慚愧,但六月十五日,睇到明報有段報導指政府耗電每年上升,根本完全違反自己訂下嘅目標,每年慳電5%!當中康文署過去五年耗電量就上升咗14.1%,因為有新設施啟用之故,政府如此,小市民如左丁山用多咗冷氣,唔算嚴重吖,香港有一間大公司,年年交電費都會交少啲,年年達到節省電力目標,呢間公司叫做領匯,政府不妨向領匯學吓嘢!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載