› 選擇地區
三藩市
紐約
洛杉磯
其他美國地區
香港 台灣 北美
 
2015年06月23日

虛懷教練 - 左丁山

學生豪往美國東岸做交換生一年,六月已經散學,父母到美國搵埋佢一齊旅行,去完紐約就飛往西岸,在三藩市紮營,漫遊灣區矽谷一帶,好不疏扶。事先左丁山建議佢地住在Union Square後面之萬豪酒店,從酒店出嚟唔駛兩分鐘就到達Macy百貨公司,方便豪媽媽購物,跟住到隔籬之著名餐廳Kuleto's吃晚餐(一定要提早預訂,因日日滿座)。豪爸爸話食得好過癮,食物與服務都一流喎。不過埋單時俾貼士就夠勁了,要收18%,唔怪得服務殷切啦,我地香港人到美國最唔慣就係呢樣,乜俾貼士要俾咁多㗎,有乜法子唔懷念日本服務吖,零貼士喎,淨係呢一樣,已經要佩服日本人,或曰,喂,日本可將貼士融入餐費之內啫。當然會係,但與美國比較,高級餐廳內嘅餐費,又唔會便宜得過日本嘅啫。
學生豪阿叔有一位中學同學在美國攞到天文學博士學位,現於柏克萊做研究天文天體,請學生豪等三人參觀柏克萊校園,順帶講解星體科學,大家聽到一嚿雲,畢竟高深科學並非普通人可以理解嘅,不過呢位李博士嘅奮鬥求學經歷,由被人視為band 3中文中學嘅學生到成為柏克萊天文研究員,就對學生豪好有啟發性,知道讀書需要不止天份,不純粹是天份,還要孜孜不倦,勤奮不懈。
佢地逗留期間,適逢金州勇士隊勇奪NBA決賽冠軍以四勝二負嘅賽績,擊敗克里夫蘭騎士隊,渥克蘭及三藩市一片歡騰,按美國做生意慣例,印上NBA Champs嘅勇士隊波衫即時上市,肥仔K以前在灣區讀書係勇士擁躉,受苦多年,今次見到勇士自1975以來第一次攞冠軍。歡喜若狂,立即叫學生豪代買球衣,左丁山聞訊,亦唔執輸,要豪爸爸買多一件,最好嘅話,如有教練Steve Kerr嘅波衫,再買多一件。Kerr以前在公牛與馬刺隊打波,贏過5次NBA指環,但係屬於搭「順風車」性質,在公牛有米高佐敦及積臣教練,在馬刺有鄧肯與波普域治教練,皆籃球之神,Kerr只係配角,出場射吓三分球而已,想唔到佢第一次做總教練,就帶領勇士奪標,媲美另一位籃球神人Pat Riley(1982),真係成就非凡,報導話Kerr為人謙虛,肯聽不同意見,今勻輸咗第二、三場之後,佢嘅28歲助理大膽建議放棄長人中鋒Bogut,改打「矮人陣」,用副選伊加多拿做正選,Kerr即時聽從,果然變陣後連贏三場,反敗為勝,如此虛懷教練,相信以後可繼續贏落去!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載