› 選擇地區
三藩市
紐約
洛杉磯
其他美國地區
香港 台灣 北美
 
2015年06月27日

秘密露底 - 左丁山

831政改方案闖立法會失敗,第一個犧牲者係湯家驊,於6月22日宣佈退出公民黨,退出立法會,佢係代表公民黨在新界東參加直選嘅議員,退黨騰空番個議席出嚟,算佢有交代,不戀棧。呢個席位明年就會到期,照理仍然需要補選,但當選者只有係「短命議員」,參選都要付出相當大嘅代價(即競選經費與時間)。
無論建制派點講都好,建制派在議會輸就是輸了,歷史記載會係28票反對,8票贊成。現在有人做阿Q,話否決正中中央下懷,大家當作笑話便是。建制派臨場表現得無溝通、無計劃,順帶亦揭露咗一啲公眾平時有懷疑,如今得到證實嘅情況,例如:
(一)劉皇發先至係建制派班主/大佬,建制派議員唔等佢到場投票唔得,譚耀宗驚到講錯劉皇發為「黃宏發」,實則宏發只是一介書生,皇發先至係大老闆。
(二)建制派受正宗左派民建聯指揮,葉劉淑儀公開講民建聯係建制派黨鞭,承認葉國謙係領頭羊,佢一企起身行,其他人就要跟隨。
(三)新民黨係西環支持之附庸黨,作用一如毛澤東穩奪江山之後,就邀請一啲昔日反蔣黨派為民主人士,參加政協一樣。葉劉有野心競選特首,並非秘密,原來秘密係佢甘心臣服於民建聯。新民黨副主席田北辰(田北俊細佬,男拔優異生,康奈爾大學畢業,哈佛MBA,G2000老闆,學歷極優秀之富二代)在明報撰文(6月22日)批評大佬田北俊,文內有云:「今覺醒團結僅限於大是大非長期商討的立場,例如政改立場,而且必須是中央最高指令下,不容半點質疑及差池的集體行動。」好一個「不容半點質疑及差池」,哈佛MBA有一個張震遠,已令人讚嘆,今又有一位田二少,哈佛精英原來可以咁鬼聽話嘅,真係唔講唔知,難怪葉劉去完史丹福之後,言必史丹福咁滯,聽聞有啲中環史丹福校友想話祈求葉劉:「拜託你唔好再講史丹福嘞,講你係港大畢業生,係林鄭袁國強譚志源師姐啦!」
(四)西環威過禮賓府,6月18日下午三時半,經民聯梁君彥坐賓士直入中聯辦,解釋蝦碌事件,點解佢唔去禮賓府搵梁特解畫而去中聯辦呢,依家大家都清楚啦,中聯辦先至係揸弗人。
(五)工聯會與民建聯不和,王國健第一個走出嚟批評葉國謙,工聯會大阿姐陳婉嫻硬過葉劉,見葉國謙起身竟然郁都唔郁,留在議事堂內,葉黨鞭可能要退下了!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載