› 選擇地區
三藩市
紐約
洛杉磯
其他美國地區
香港 台灣 北美
 
2015年06月29日

散兵游勇軟腳蟹 - 左丁山

建制派不斷製造笑話,上網睇佢地嘅WhatsApp對話,真係充滿娛樂性。星期日中午,外匯G請食飯,去邊呢,佢話左丁山提過一間灣仔潮州菜叫做「古琴」,又話幾好食,咪又去「古琴」囉,於是幾位老友又在「古琴」聚會,但比上次少咗成半人,皆因有幾位已提前放暑假,外遊去也,外匯G話佢自己在六月尾去北歐,然後到西歐,三個星期後回來,董事長N話食完呢餐,佢準備到歐洲旅遊,榮譽領事W又話即將去倫敦訪友,講唔埋三位仁兄會在倫敦唐人街偶遇食唐餐㖭。
今次飯局話題離不開建制派在618甩轆情景(心水清人士指香港有過618雨災,發生於1972年6月18日,旭龢大廈倒塌,翠屏道木屋區山泥傾瀉,造成156死,117傷。618當然亦係拿破崙慘遭滑鐵盧嘅日子),指政治後果上,2015年6月18日之立法會投票,可與618雨災相提並論。碰啱有報紙不知有甚麼高超方法得到建制派群組討論嘅WhatsApp對答,更引起大家興趣,左丁山上網睇完第一波、第二波、第三波,不禁啞然失笑;曾鈺成主席素來形象比較中立,原來亦牽涉在內,與各建制派人馬談及如何逼「大嚿」(陳偉業)發言,實際上一啲都唔中立,於是咁就案中有案,泛民要唔要逼曾鈺成辭職呢?左丁山認為無此需要,如果曾鈺成辭職嘅話,一定有其他建制派人士頂上,一來新人對議事程序唔夠熟,上位後可能比曾鈺成更不中立,會直情吹黑哨都唔奇,泛民諗清楚就知道兩害相權取其輕,放過曾鈺成對泛民更有着數。
從短訊對話內容之中,可知建制派內無真正壓得場嘅首領,溝通一片混亂,葉國謙聽講係「班長」「黨鞭」,理應在緊張混亂場合,出聲鎮住眾人,點知唔係,而係一人一句,林健鋒講Let Play! Go Go Go,鍾樹根嗌:好玩,陳婉嫻助理加入討論,31人離場之後連曾鈺成都講:玩乜?陳鑑林回答:兩個字:失敗。左丁山同外匯G等老友講:呢啲絕密臨場短訊充份證明中央冇事先一套Plan A、Plan B交帶落,完全係由立法會建制派議員自行決定,卒之佢地自行了斷,結果貽笑國際。阿爺用咁大力量支撐建制派議員,本想用兵千日,點知想話用在一朝之際,成班人似足散兵游勇,亂作一團,不戰而敗。明年立法會選舉,阿爺如無清洗大計,吾不信也!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載