› 選擇地區
三藩市
紐約
洛杉磯
其他美國地區
香港 台灣 北美
 
2015年06月30日

新派日菜 - 左丁山

新亞大師兄C話要介紹佢位大公子俾左丁山認識,約吃午飯。師兄C請吃飯,最鍾意去山光道馬會幸運閣,但呢排成日落雨,港島區中午交通異常擠塞,無謂由中環走上山光道啦,搭的士唔係咁易嘅啫。而且仔大仔世界,左丁山提議由C公子揀地方,最好就近在中環。
呢,C公子原來在長江中心返工嘅,C公子就揀咗置地廣場嘅Zuma,師兄C話佢未去過,梗係啦,老一派人物要在中環食日本菜,過往置地廣場地庫嘅賀菊係一個好選擇,但美心集團去年已將「賀菊」執咗(雖然生意不俗),改裝修走較為大眾化路線,成為中餐日式料理嘅simplylife版本,開放式,幾似高級打冷店,老實講,就唔係左丁山嗰杯茶,所以只係行過,未幫襯過。於是在置地廣場要食日本菜嘅話,只有去Zuma。
去過幾次咯,每次都係人地訂位嘅,呢間新派日本料理走fusion路線,賣西式日本餐,師兄C 60年代留學早稻田,精通日文,見到日菜餐廳只有中文英文而無日文,覺得有啲奇怪,何況價錢並不便宜㖭。不過世姪C原來貴為一間巨型資產管理公司嘅「北亞區董事總經理」,在吃香行業之吃香公司做高層exec,請爸爸與世叔吃一餐勁嘅亦無妨。世姪貴人事忙,未夠兩點已要返回辦公室,於是兩個老嘢傾起為甚麼Zuma咁好生意而「賀菊」要收檔?內裏真正原因我地唔知,但大勢所趨係中環行政人員可以負擔得起高級消費嘅,不少係海歸留學派,講英文多過講中文,紐約、LA、三藩市潮流為佢地所喜,「賀菊」呢類正規日本菜,對佢地嚟講未免單調啲,於是Zuma呢類東西合璧日菜西吃,具紐約氣氛嘅食店受歡迎,Zuma之港式版粵菜就係都爹利會館,講英文之有銀年輕人會光顧都爹利會館,佢地嘅父執輩先至會去陸羽啫。師兄C畢竟有日本人風格,對Zuma風味唔多慣,事實上,如果吃餐日本料理要千零蚊一位,去史丹利街嘅「山下」鐵板燒就比去Zuma實惠得多咯。之不過,師兄C亦感嘆,進入21世紀後,日本傳統經營模式在全世界節節敗退,在電子電器消費產品方面,尤其輸晒俾南韓廠商,鐘錶更一沉難起,師兄C話一想起呢一點,或者美心集團放棄「賀菊」,亦係革新求變,迎合千禧一代(1981-1997)啫!(按:美國傳媒界定千禧代Millennials係1981 - 1997期間出生人士。)

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載