› 選擇地區
三藩市
紐約
洛杉磯
其他美國地區
香港 台灣 北美
 
2015年08月08日

零售零和遊戲 - 左丁山

呢日遇到中大聯合書院師弟莊偉忠,恭喜佢嘅新書《不開會的CEO》暢銷,聽講出到第四版咯噃,莊師弟話:「出版社話計劃緊出第五版。」香港書籍幾難賣得過萬本,莊師弟嘅書去到第四版,點都超過一萬本啩?版稅就唔收得幾多嘅嘞,但好看書之人如莊師弟能夠自己有一本暢銷書總係開心嘅。
近月香港零售市道差,一日不如一日,六月份零售總值只有370億元,係近期低位。問莊師弟點睇零售市道,佢話:「一個字:差。全行叫苦,因眾所周知原因,內地客來港買貨掃貨嘅,日漸減少,到明年4月,當全部一簽多行證件到期,必須改為一周一行之後,相信情況更壞。以我管理嘅沙田新城市一田百貨嚟睇,拖喼客確係少咗,掃大件貨嘅客亦少咗,買日用家居用品、蔬果者就有增長,相信原因係內地反貪腐,香港匯水貴,內地客要收斂吓。」
莊師弟話三年前已有居安思危之策,大力開發日本「產地直送」來源,現在連邊隻水蜜桃係日本邊個農夫所種,都可以追蹤得到。好彩行先一步,一田銷售額仍有增長,但現在香港總體零售額有所縮減,某一店或集團嘅銷售增長,就係來自其他集團嘅萎縮,係一場零和遊戲。左丁山聽聞某大零售集團就係睇中「產地直送」呢一樣,已搵齊日本通做顧問,不日自日本直接入貨,與一田爭奪市場。
零售戰爭打起嚟會好殘酷,老牌名牌冇得恃老賣老。幾年前畢打街A&F開幕,一大班上身裸露男模轟動中環,該店生意好到不得了。當日左丁山與美國老友剛好在開幕時分經過,被阻住唔准行,美國老友憤言:「沽空呢隻股票」,相信係一時氣憤箒,記得當日股價係52美元左右,近日呢?在20美元上下浮動,已經唔見咗六成,假如當時真係沽空,利潤都幾好,不過真係講吓笑箒。美國報紙報導,美國傳統名牌Gap、A&F備受H&M、Zara與UNIQLO競爭壓力,連連退守,失晒過往威風,老牌連鎖店如Kmart、JC Penney、Sears更被年輕人視為阿爺阿嫲先至光顧嘅地方。追尋背後原因就係美國消費者鍾意逛街,唔喜歡行商場,三個外國牌子專注在繁盛大街俾貴租開店,唔吼商場,剛好捉正條路,所以在大城市贏晒。香港因地理環境不同,靚商場仍有競爭力,在街頭街尾商場買劏舖,想清楚至好!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載